炎夏即較易見到青布冧，智利、澳洲、中國均有出產。家陣搵到嘅以祖國貨居多，售價比去年更抵食，過去青布冧每個約兩個半，今年十蚊七個，平均一個都唔使個半。青布冧色澤雖然青BB，其實食味甜，肉爽脆。祖國出產嘅雞心青布冧，Size細細，但品質都相當不俗，而且勝在抵食，部份較細個嘅青布冧重平，十蚊九個，更加抵食。
近日行超市，見到啲雞蛋殼上有啲藍色字，求知慾強嘅我當然會將佢攞上手睇真啲，原來唔係污糟咗，而係印上食用限期，買時可知雞蛋是否新鮮，又幾細心喎！𠵱家重做緊特價，好抵買，一打中裝嘅雞蛋$8.9，一打大裝嘅$10.9。
夏天飲品種類零舍多，喺包裝上更加係多元化。暑假又到，為吸引小朋友，市面嘅飲品，唔少更以趣致嘅卡通或漫畫裏嘅主角作為包裝，見到呢款新推出嘅老夫子飲品，就勾起我對童年嘅回憶，飲嘅時候就更加親切。吉之島有售（除荃灣店外）。
味王老夫子飲品係台灣製造，每樽容量600毫升，只係四個零，分別有麥仔茶、綠茶及檸檬茶三種口味，我自己比較鍾意綠茶，因為成份除咗綠茶之外，重有茉莉花，所以飲落零舍清香；麥仔茶係由大麥、決明子所做，味道幾香；檸檬茶則會較濃，各有風味。
文：肥師奶