七十二歲老嫗岑麗芳，一生孤苦坎坷。丈夫與長子早逝，次子誤入歧途，三女正在戒毒所服刑，一直與她相依為命的輕度智障孻子近月亦失去蹤影，岑婆婆心灰意冷之餘，還要為三餐憂慮，惹人垂憐。
頤養天年，是每位老人家的心願，偏偏兩鬚斑白的岑婆婆，至今仍為一身兒女債寢食難安。「成世人都唔知做錯咗啲乜，好似注定要受呢啲苦。」說起半生遭遇，岑婆婆禁不住搖頭歎息。
自言嫁錯郎的岑婆婆，丈夫酗酒成性，年輕時的她，靠當車衣女工，一手撫養四名子女成人，可惜劬勞未獲回報。岑婆婆的長子於四年前因肺癌病逝，無法侍奉跟前；次子誤入歧途，傷透她的心；三女染有毒癮，正在戒毒所服刑；么子患有輕度智障，自顧不暇，近月還無故失蹤，叫岑婆婆憂心不已。
「識諗嘢嘅，就學壞；唔識諗嘢嘅呢粒仔，反而最乖，最錫阿媽，希望佢千祈唔好有事。」喃喃自語的岑婆婆，一臉惶恐地說。
三十五歲患有輕度智障的阿文，從事清潔雜工多年，雖然收入微薄，但每月仍將大部份薪金交予母親作家用，閒時會四處拾荒幫補家計。「佢每個月搵得四千元，都畀二千元我，平日收工重走去執垃圾，執埋一大堆唱帶、報紙，佢話值錢喎，呢粒仔話佢蠢又蠢唔晒。」奈何一年前，阿文不幸被公司辭退，以致情緒大受打擊，上月初，他踏出家門後一去不返，音信全無。
「我知呢個儍仔一定係唔開心行開吓，又或者四圍去搵工啫，佢一定會返嚟，佢話過無論點窮，都唔會丟低阿媽唔理。」事實上，岑婆婆目前除了擔心兒子的安危外，經濟亦備受困擾。
岑婆婆表示，自從兒子失業後，母子只能靠她的一份生果金及積蓄維生，惜近月已窮途末路。「我份生果金得七百零五元，兩仔乸邊夠使吖，早排我哋就將儲埋好耐嘅垃圾一次過賣晒，賺到啲錢啱啱夠交租，上兩個月就靠賣咗屋企唯一嗰條金鏈頂住，𠵱家真係乜都冇晒，唔知點算。」
瘦骨嶙峋的岑婆婆慨歎，現身上只有不足十五元，連日來僅能以稀粥果腹，且欠下房屋署一個月租金，恐有被迫遷之虞。岑婆婆已向社會福利署申請綜援金，惟仍在審核中，蘋果日報慈善基金有見及此，即時撥款五千元助她應急。
捐款編號：C0626
暖流熱線
電話：29908688
傳真：23702192
電郵：
網址：