小小超李澤楷旗下嘅Musicnation公司搵咗李進揸旗之後，今年會主力捧新人，而二十五歲嘅蕭正楠就係佢公司主力栽培嘅新星之一。
日前蕭正楠喺尖沙嘴海旁同便利店拍新歌《眼光獨到》MV，重搵埋公司明年嘅秘密武器、二十歲嘅女新人Priscilla拍檔做情侶，𠵱家呢位女新人接受緊公司嘅訓練。
蕭正楠喺個MV入面經常俾Priscilla用相機偷拍佢，初時佢都唔為意，但幾乎每個地方都見到呢個女仔，佢開始覺得有問題，不過心裏就覺得Priscilla幾有眼光，竟然識得欣賞佢。
李進對蕭正楠有幾大期望？聽聞唱片公司諗住搵佢打余文樂，睇嚟今年樂壇嘅新人獎，又有一番激鬥啦！
無綫電視劇《皆大歡喜》又搞新意思，劇情會發展到梅小惠變咗做大婆，至於趙學而就梗係做二奶啦。噚日《皆》劇喺電視城搞咗個記招，特別宣傳呢件事，重要小惠同學而比賽，心裏有數、一早就知要做二奶嘅學而就好似無精打采咁，玩遊戲都唔起勁。至於做大婆嘅小惠，就相當落力，梅小惠話：「我個人做嘢認真啫！」
彭家麗噚日去新城接受《家天下》訪問，佢話自己𠵱家專注幕後工作，而且定期要交歌畀台灣嘅公司。另外，佢仍然忙於教唱歌，對於近日咁多新人，佢就比較睇好關心妍，因為覺得佢唱歌唱得好好，而且佢啲學生成日都帶住關心妍嘅碟上去學唱歌。
馬浚偉（馬仔）噚日去咗灣仔會展出席書展，問到佢早前有報道話佢同郭羨妮兩個半夜喺車廂談心，馬仔就笑一笑咁話：「梗係唔係啦，傾有關出書啲嘢咋，因為我就嚟出書，我同佢又係好好朋友，話題又啱，咪收唔到口囉。」問佢對郭羨妮有冇好感，佢就話要睇緣份。
另外，問到馬仔對舊愛蔡少芬重有冇好感，佢就即時話：「蔡少芬唔好講，唔好舊事重提。」
鄧小艾日前產子，喺醫院期間，鄧兆尊都有去探個妹。但兆尊噚日喺電視城講起個妹，好似乜嘢都唔知，就連個外甥叫乜嘢名都唔知。雖然佢講到漠不關心咁，但係佢就無端端走去搵人幫個外甥仔批八字，佢話：「係我幫佢check嘅，BB嘅將來都係平平無奇，好事多磨，得不償失，不過將來都係要靠自己。」