港股噚日跟隨外圍升番，連帶好多二三線股，甚至創業板股仔都借勢造好。
不過，經紀黃就同小初講，其實好多創業板新股根本散唔到貨，但因為好多表叔上咗身，所以局住死頂，希望有日市況好轉，可以大翻身。上個月底同日掛牌嘅長春達興（8067）同埋常茂生化（8208）就係典型例子。
長春招股價45仙，掛牌以來，最高炒過上80仙，噚日重有69仙。至於常茂招股價係55仙，最高見過83仙，噚日就收70仙。
經紀黃話，以成交量計，長春嘅陣容鼎盛好多，皆因大陸炒家搵咗一批本地炒家幫手，所以睇落熱鬧啲，而常茂主要由大陸炒家主理。
長春因為牽涉嘅人較多，因此升得快時亦落得快。常茂則有多少似金衛醫療（8180），炒作人馬亦非常相似，但就唔知係咪好似金衛一路頂得住。
趙飛雲