一般球會有需要先至會從轉會市場收購或者借用合適球員，但我求大俠睇今次李瑋峰同李鐵嘅「雙李事件」，似乎真係球員要球會要人，多過球會搵球員嘞！
中國球員喺世界盃之後降價已經係不爭嘅事實，之不過好似原本由李鐵加盟愛華頓，到最後公布居然係李瑋峰，以前真係唔多有同類事件發生。
雖則中國喺世界盃淨吞九蛋，但我求大俠覺得中國球員未至到好似要人收留嘅地步，開季後有得踢就好啫，如果同日本稻本潤一上季喺阿仙奴一樣，長坐冷板櫈，只係齋操，進步程度肯定唔及喺英甲踢幾場比賽。
總之，愛華頓搵中國球員重有錢收，大家都知嘞，如果真係加多件李鐵又何妨？！
巴西教練史高拉利「大菲」日前承認，世界盃期間所用嘅戰術及球員出任位置等，都係「複製」自阿根廷嘅。我求大俠就覺得，史高拉利喺度玩緊明褒暗貶，等你班阿根廷佬睇下，大家用埋同一個戰術，但係我哋就贏到冠軍，你哋就早早出局，重唔死？
英超聯新球季球證執法尺度再收緊，向球證講粗口隨時要做紅牌阿姑。不過維拉老將麥臣對條新例就不置可否，覺得太投入比賽時係好難避免唔爆粗！如果真係貫徹呢條例，相信紅、黃牌會經常出現，到時真係有嘢睇囉！
世界盃矚目新星迪奧夫，已經正式去咗新球會利物浦報到，重大讚球會點好點好，睇嚟無揀錯班落咁喎！唔單只咁，迪奧夫重話班新隊友好nice，希斯基就自願做佢英文老師、奧雲仔同埋利斯重當正佢兄弟咁friend，睇嚟迪奧夫唔單只好波，重好識做人㖭。