又係我陳啟泰，唔好以為做主持好容易，好似我做《百萬富翁》咁，雖然事前操弗自己，但依然瞓得唔好，日夜顛倒，要靠食安眠藥、做腳底按摩同針灸嚟支持。同樣，參加呢個遊戲嘅朋友，唔單止事前要溫習好，而且頭腦一定要冷靜同清晰，如果唔係，搞到唔識善用錦囊嘅話，就算你有幾叻都未必可以攞到嗰一百萬大獎啦。
今日我就同大家講講點樣好好利用三個錦囊。首先，如果係一啲比較大路同基本常識嘅問題，而你又唔係太肯定嘅話，就記住要問現場觀眾，包保答案最穩陣；去到一啲專科問題，當然係打電話問朋友啦，而且最好叫定朋友用寬頻上網，有乜事一check就掂；到最後「五十五十」，就可以運用喺一啲完全冇人知嘅問題度，除去兩個唔啱嘅答案，你嘅機會咪自然大咗一倍囉。記住「錦囊要識用，千祈咪衝動」。（五之四）
口述：陳啟泰 筆錄：戴彩煥 攝影：羅德光