港股拜外圍所「賜」，又創出今次跌市新低。恒指噚日落到10213，大跌逾200點，尾市反彈，收10335，跌86點，成交74億元。市勢雖弱，官股卻有大戶大手食貨，賣掉1.01億個單位，噚日EAS10268有着數；尚餘3600萬個單位，今個禮拜應可賣晒。
格林斯潘唱好美國經濟，認為復甦勁度比預期強，但股市冇面畀，反彈曇花一現，又再插過，杜指周二又跌166點。美股連跌7日，如無記錯應係98年以來「最慘烈」的1次。
格老對於造假數嘅人，不假辭色。本來美國經濟復甦會有更好嘅表現，但假帳醜聞愈爆愈多，愈爆愈大，令到投資者冇晒信心，股市大散，經濟復甦前景可能會受到影響，所以格老認為要對害群之馬加重刑罰，以遏止呢股歪風。不過，布殊政府對此仍未落槌，相信要有一段時間討價還價。
假帳醜聞自Enron事件掀起序幕，至今已逾半年，呢段期間，大企業有如驚弓之鳥，紛紛翻查舊帳，如再無「蠱惑」，無論大小假數都難以再遁形，所以，過埋呢個禮拜，美公司假帳醜聞嘅高危期就可以告一段落，人心亦會定番啲。
格老向投資者派定心丸，話家下通脹溫和，聯儲局在可見將來，不會急於加息，直至美國經濟完全擺脫困境為止。BNP百富勤估計，美國會到12月才加息，而高盛更預期，在未來的1年內，美息上升的機會都不大。
美股近期跌得咁急，落番去911事件後的水平，與經濟表現背道而馳，只要假帳醜聞及美元弱勢告一段落，美股將會見底回升，港股亦然。
噚日上升股唔少，逆市者有首長科技（521），高收0.71元，升3仙，中資線路買盤頗為活躍，市場消息甚勁，謂現時正斟洽一項大計劃，夥伴包括有本港大財團，如進展順利，一兩個月內可以落實，股價有機會見1字頭。
郭兆誠