梁詠琪（GiGi）本身冇吸煙習慣，佢亦好清楚吸煙危害健康，而近年嚟青少年吸煙情況愈嚟愈嚴重，商台同防止青少年吸煙委員會合作搞咗個「新一代健康歷程領隊」，就搵咗GiGi、方力申、何韻詩、葉世榮等宣揚反吸煙訊息，同埋鼓勵年輕人多參與有益活動。日前GiGi喺灣仔參加咗一個漫畫課程，佢重同其他學員一齊學畫漫畫。
另外，GiGi做咗奧林巴斯相機嘅代言人，早排佢就喺上海拍咗個廣告，日本方面重派出攝製隊去上海取景。GiGi話：「今次有機會同日本奧林巴斯相機合作，我覺得好開心，近日我有個心願，就係希望可以出版一本由自己操刀嘅攝影寫真集，希望年尾可以出版，𠵱家我一得閒就會攞部相機影相。」
張栢芝近期用工作麻醉自己，佢本來喺上海拍緊戲，一有空檔就連夜飛過去南京見歌迷，雖然佢只係休息咗幾個鐘，但係依然好似好開心。栢芝噚日接受新城節目錄音訪問時話：「我發覺辛苦中係可以搵到快樂，我未休息過，體力上好辛苦，但係好開心，心情輕鬆兼冇壓力。」
陳曉東（東東）噚日接受港台《娛樂滿天星》訪問。
講到陳小春搶記者攝錄機嘅事，東東話：「係咪啲記者追住佢呀！我以前都試過俾狗仔隊跟，我自己就會用好友善嘅態度，叫佢哋唔好做狗仔隊咁辛苦。」問到東東同栢芝有冇機會復合？佢話：「朋友可以做一世，而且大家咁熟。」
楊怡噚日喺電視城着住件晚裝，原來佢喺度試緊新劇《衛斯理》嘅造型，但係見佢幾乎想將件晚裝拉到上頸咁滯，驚死走光咁。
楊怡重話自己唔可以好似家姐楊娜咁去選美，因為佢話最怕着住件泳衣俾人評頭品足喎。
洪欣噚日喺電視城錄影遊戲節目《一觸即發》，講開佢間時裝店，佢話最近正着手準備喺將軍澳開分店，不過佢話自己只係小股東。其實洪欣喺多年前開過間生果店，但係蝕錢，因為佢屋企人完全冇興趣幫手睇舖。不過𠵱家同人夾份搞生意，淨係拍吓廣告硬照就得喎！
蘇志威噚日參加無綫遊戲節目《一觸即發》，佢老婆劉小慧趁住暑假重帶埋三歲嘅囡囡蘇君蕎出現，實行一家大細支持蘇志威。不過蘇志威睇嚟重怕羞過佢囡囡，堅持唔影合照，但係小慧就不時同囡囡話：「爹哋就嚟玩遊戲啦！」十足十兩個小fans咁。