陳小春涉嫌搶英皇老闆楊受成旗下的雜誌《東方新地》記者的攝錄機，Twins昨日竟指是老闆旗下雜誌的狗仔隊做錯，並力撐小春，呼籲周刊減少狗仔隊。
英皇人氣組合Twins昨日出席會展舉行的「戴倫爸爸與Twins勵志金句比賽」致謝儀式，《戴倫爸爸》是港台DJ梁奕倫出的書，Twins替他寫序，梁奕倫並即場送了書給Twins。
問Twins可知道陳小春涉嫌搶其老闆楊受成旗下雜誌《東方新地》記者的攝錄機，阿嬌﹙鍾欣桐﹚說：「Sorry吖，我唔睇報紙㗎！」而阿Sa﹙蔡卓妍﹚則說：「我有睇報道，都唔明點解娛樂新聞咁鍾意擺喺港聞版。搶嘢好小事之嘛，咁樣對藝人唔公平，擺港聞同擺娛樂有乜嘢分別啫，最多咪加句中國籍男子藝人陳小春！我哋成日有狗仔隊追住影相，好煩好討厭，但又唔可以做啲乜，又唔可以表現不耐煩！」
而阿嬌亦說：「私隱嚟嘅嘛，咁無聊，冇興趣，影人買嘢，都冇人想知！」其後兩人你一句我一句說：「我哋都好同情陳小春，容忍係有限度嘅，如果個記者冇做錯，陳小春冇理由會搶佢嘢。啲狗仔隊好煩，叫啲周刊減少啲狗仔隊啦，將啲人手調去第二個部門，咁樣慳好多。啲狗仔隊好犀利，又坐Benz又坐寶馬掩人耳目，好彩我哋嘅司機好醒目，記得晒啲狗仔隊，佢哋唔使諗住可以跟到我哋。不過一家唔知一家事，我哋同小春又唔同一間公司，就算同公司，都唔清楚啲嘢啦！」
此外，活動原定一時舉行，但Twins遲到了半小時，她們說：「我哋一早到咗，等咗成個鐘，呢啲係大會安排。本來我哋想做完記者會之後去書展支持吓呢本書，但書展嗰邊怕我哋去到場面混亂控制唔到，所以取消咗呢個計劃。」而今年的書展，大會方面因為安全問題勸喻紅歌手不要出席書展簽名會，所以場面較往年冷清，其中最受歡迎的檔口，是賣台灣人氣組合F4寫真的攤檔。
攝影：陳偉權
採訪：魯萍