鍾鎮濤（阿B）本周一申請個人破產，他昨日在中環舉行記者會交代，面對過百傳媒，阿B表現有點緊張且一度熱淚盈眶，他強調自己會以積極態度面對問題，破產後仍會繼續努力工作還錢，因為他相信天無絕人之路。提到章小蕙謂要與他有粥食粥，他卻表示不用客氣。
鍾鎮濤（阿B）與章小蕙拖欠裕泰興二億五千萬元，阿B於周一申請破產後，昨日在其經理人位於中環的辦公室外之天台舉行記者會，交代破產事件。
昨日阿B表現得有點緊張，還一度眼泛淚光，他說：「我今次（申請破產）係經過詳細考慮後所做嘅決定。因為我欠嘅債係天文數字，過往幾年我一直都好努力咁工作、賺錢、還錢，但我真係冇辦法還得清，等破產之後由破產管理局將我嘅收入分配畀我嘅債主，我相信呢個係積極嘅做法，我從來都冇逃避，破產後我仍然會努力工作，面對問題。」
阿B續說：「我知道未來傳媒可能對我嘅生活變化好有興趣，可能會有狗仔隊跟我，但無論點都好，呢個係大人嘅事，小朋友係無辜嘅，大家跟我好喇，唔好跟我對仔女。𠵱家香港經濟環境好差，好多人同我一樣有負資產，就嚟破產或者將會破產，我希望大家都可以同我一樣，唔好逃避，唔好放棄，積極、理智咁去面對，冇問題係解決唔到嘅，我相信天無絕人之路。」
問到阿B可覺得破產是章小蕙引起，他說：「我自己嘅事，唔好拉埋其他人嚟講，我哋嘅關係已經畫咗句號。」
問到章小蕙曾謂要與他有粥食粥，阿B笑說：「我已經日日有人陪我食粥，唔使客氣呀。」至於今次破產，他不諱言是自己理財不善，投資失敗所致。
阿B又感慨地說：「以前覺得物質好重要，不斷追求名利，不斷向前衝，發生呢件事，我有好多家人朋友支持，大家關係親密咗好多，我已經好滿足，我唔會後悔，只向前望。等我可以請客時，或者感恩節，就買隻火雞，買埋炭燒畀大家食。」
提到好友陳百祥（阿叻）謂願意供養阿B子女，譚詠麟（阿倫）又表示要開溫拿演唱會為他籌錢，阿B說：「仔女嘅生活我會自己負責，但如果我搞唔掂，有契爺（即阿叻阿倫）幫手我都好感激。至於開溫拿演唱會，不如開咗我個人先啦。」而演唱會主辦人丘亞葵曾表示有意找阿B於九月在紅館開個唱。
採訪：馮美茵、何永寧
攝影：馬啟然