中國國腳曲波赴英超落班希望受到阻延，佢嘅經理人高琪就用盡方法去同傳媒解釋，成個過程可以見到有人一味死撐，真係好睇過戲。
高琪最初畀傳媒嘅解釋，係因為中國足協重未發出有關文件畀佢哋，有記者就即刻同中國足協方面求證，結果個答案係試腳根本唔使甚麼證明文件。記者再搵高琪解釋，呢次高生就話無乜問題，只係會稍為押後呢次試腳安排。
跟住再傳出係熱刺方面突然決定唔要曲波，呢次高生嘅解釋就更厲害：「到英超落班唔係咁容易㗎，雲尼斯達羅都要搞成年至去到啦！」
用雲尼斯達羅比喻曲波？級數差距之大不在話下，重有就係雲尼斯達羅去曼聯要拖一年係因為有傷，個「畸士」完全唔同。至此，我求大俠對於高生嗰種護主嘅「態度」，真係要寫個服字。
車路士後防泰利早前同隊友齊齊喺球會大本營睇溫布頓網球賽直播，其間泰利擰轉身同隊友傾偈時整親膝頭哥，要即做手術，季初賽事隨時唔使預佢。真係唔知車路士本身風水唔好，定係泰利仔行緊衰運嘞。
細佬菲臘尼維利終於都不甘長當後備，開口威脅話再唔能夠爭到正選位，就會離開曼聯。佢同阿哥加利仔一手由曼聯「湊」大，阿哥就深得費格遜器重，真係同人唔同命囉。
日前英國體育大臣卡邦尼批評今屆主辦英國高球公開賽梅爾菲特賽場拒招收女會員嘅做法，記者問活士對此有乜感想，見慣世面嘅活士好圓滑咁話、賽會有權訂立自己嘅規例，但就話希望人人平等喎。咁即係又順哥情又順嫂意啦！不如活士唔好叫「老虎仔」，叫「世界仔」啦！