近排美股一片風聲鶴唳，杜指已連跌7日，共跌906點，累積跌幅9.6%。美股雖然大超賣，但幾時至有較似樣反彈，暫時仍好難估。市場一般睇法，美股短期即使有反彈，但大方向都係繼續跌，杜指911事件後低位8062，可能好快亦會受到考驗，而納指跌穿911事件低位1387，按量度跌幅可見700，即係要再跌多一半。股市經常都係咁，樂觀時過份樂觀，悲觀時過份悲觀。
恒指噚日以裂口插穿10400大型橫行區底部，再度發出警號。恒指低位10213，再創今年新低，但外圍標普期指回升約9點（杜指約90點），港股跌幅收窄，加上新地（016）守穩56.25元防線，午市作出反彈，僅跌0.25元，令好友如趙飛雲之流仍存一絲憧憬，繼續磨爛蓆，唔肯跳車，希望有奇迹出現。
收市後睇番恒指日線圖出現粒十字星，希望噚晚美股大反彈，恒指今日以大陽燭反彈，補回噚日嘅下跌裂口，重返10400之上收市，則港股仍有生機，可以伺機買番啲中移動（941）博短線反彈。不過，如果恒指今日繼續跌，咁就真係要先計數離場。
趙飛雲