踏入七月，龍眼貨源愈來愈多，不但有泰國進口貨，中國出產石碣龍眼亦喺呢個時候上市，最近喺部份果檔已經可以搵到佢嘅蹤影。售價會比泰國龍眼稍貴，但我肥師奶認為質素稍優勝，至少食味甜得嚟較清，果肉又爽脆。
要分辨石碣龍眼及泰國龍眼好容易，石碣龍眼較細粒，果殼較深及較污糟，相反泰國品種外殼較淺色，外表較乾淨，Size較肥大，兩者分別一望都好易睇得出。
$10-$12磅 部份果檔有售
我肥師奶最鍾意試啲古靈精怪食物，天香菜雖然唔係新產品，但都係較少人食嘅一種蔬菜，有興趣試過嘅話你都會好似我咁愛上佢，細細棵，質感嫩滑，我老公都不知幾鍾意食，特別係用佢滾湯，清爽清甜。只可惜佢造期短，前後只有個零月，重要喺夏天至蒲頭，要食嘅話好趁手。每紮大概有半斤重，價格都幾穩定。
$5-$6紮 部份菜檔有售
早兩星期話咗畀大家知喺金鐘Great有得賣大隻嘅泰國軟殼蟹，最近連吉之島都有軟殼蟹出售，呢啲軟殼蟹係由越南進口，雖然唔及泰國品種咁大隻，但勝在抵食，一盒兩隻，只係十幾至二十幾蚊。買返去最簡單食法係以滾油炸至香脆就食得，送酒一流，喺食肆分分鐘要六、七十蚊碟，自己煮就最經濟實惠。
$12.8/100克 吉之島有售
文：肥師奶