長實嘅尖沙嘴港景峯，聽聞噚日招待全國人大港區代表李鵬飛一家睇樓，由執行董事趙國雄出馬接待，畀足面。
飛哥同屋企一行六人，噚日下晝到港景峯現樓，先睇第3座58樓示範單位，再睇埋2座A同G單位。聽講佢對3座50樓以上嘅C單位好感興趣，面積千一方呎，3房設計，呎價估計要七千蚊以上，兩個單位最少盛惠1540萬元。
港景峯3座58樓C室望九龍公園，重有270度維港海景，係全座大廈景觀最佳，唔怪得飛哥最後都係想買3座單位啦！
不過，飛哥似乎重未揸得定主意，據講佢老人家諗住一間自己住，一間畀個仔，所以想買相連單位，但個仔似乎唔係咁想，相信大家都知點解啦！另外，佢又諗一間一家人住，另一間用嚟投資。
蘭西聽講早前個仔請佢去韓國睇世界盃，令佢老懷大慰，就諗住買層樓畀個仔。真係24孝老竇。
國內地大物博，唔少大型屋苑好似中山雅居樂、順德碧桂園同番禺祈福新邨，起十年八載都重未發展完，廣為港人熟悉嘅祈福新邨就好積極搞活動，最近同「中國精英車主會」合作，住客入會，可獲多項優惠。
「中國精英車主會」今次係第一次同屋苑合作推出優惠，揀祈福新邨，聽講係因為一半業主即超個一萬三千戶擁有汽車。「中國精英車主會」係由一批車行聯盟成立，共有五萬會員。
情侶拍拖好多時都會為去邊度玩而煩惱，香港興業為此舉辦「1001夜越洋浪漫之旅」選舉，只要提供認為同至愛最溫馨浪漫嘅拍拖勝地，就有機會得獎。獎品係三日兩夜曼谷Sukhothai，或新加坡聖陶沙Beaufort六星酒店雙人免費食宿。到時就真係可以浪漫溫馨嘞！聽講單是房租每日要二千三百大元。
香港興業搞呢個活動，當然係想話畀大家聽佢哋下個月賣嘅愉景灣海澄湖畔二段，住客日日都可以享受到度假feel。參加表格今個禮拜五喺報紙刊登，重會喺中環3號碼頭同地鐵站派發，7月31號截止，8月頭公布結果，名額共五百個。
獎品可以喺兩年內使用，但發展商只係提供酒店食宿，但點樣去就要自己搞掂，到時得獎情侶會唔會因為搭飛機問題而鬧大交？
另外，香港興業話想在海澄湖畔開售前，請記者去其中一間酒店體驗一下，重出埋機票㖭。
代理為做成生意，送定到內地或海外情況趨普遍，好多時都會親身前往，但世紀21總行最近做成嘅交易就特別啲，係用DHL速遞合約畀業主搞掂。該行聯席董事陳瑞常對蘭西講，業主係新加坡華僑，一直喺新加坡住，在港開公司，前年以八百萬買入堅尼地道珀苑17樓C單位，1750方呎，用嚟收租。半年前有個客想買呢個單位，但業主一直堅持要780萬至賣，傾咗半年買家終於肯首。
其實業主之前已fax咗份簽咗名嘅合約畀世紀21，陳瑞常話為咗穩陣計，再DHL份臨時買賣合約去新加坡畀業主補補飛。
上個禮拜蘭西講過，利嘉閣分行經理陸偉傑送定上深圳做成咗單藍田滙景花園買賣後，周一晚又案件重演，地點就遠啲，喺廣州，上到去已是凌晨，業主見佢咁交帶，將佣金由0.5%加到1%。呢個業主長期在內地工作，太太在港居住，聽講有意轉買貴啲嘅物業。睇嚟利記可以做多單生意。今次做成嘅係觀塘麗港城20座中層A室，941呎，成交價246萬元。
政府土地儲備表大把大型市區地皮任發展商揀，𠵱家已經好少發展商肯花時間同心思去併購舊樓。但西半山近雍景臺嘅西摩道同衛城道，上月SharpIntelligenceInt'lLtd，用2250萬買咗西摩道2C號1至3樓，衛城道23號1樓同25號地下，擺明係併樓。
由西摩道2A號開始至衛城道29號共9個號碼，一律樓高4層，1梯1伙，樓齡46年，每伙約1700方呎。
早於89年底，EgremontEstatesLimited用130萬元，購入西摩道2E號1樓，呎價765元。93年再以370萬元購入西摩道2B號1樓。業界盛傳太古地產以不同公司收購上址，太古就冇回應。
西摩道同衛城道嘅舊樓，聽講唔少係出租，重好受外籍人士歡迎。
蘭西
電郵地址：