收市前，日本官員開口話要干預日本紙，美元反彈，連帶歐洲股市同港股回升，恒指只跌86點，由低位起計，跌幅收窄122點。窩輪快上快落係人都知，𠵱家變化更加厲害。市道正常時，1隻窩輪升跌5成賺蝕5成，需要一兩個月，𠵱家1日或幾個鐘頭搞掂。
例如恒指Call輪9045，假如前日尾市上車，買入價4.6仙（已經比上日大跌28%），昨日喺最低價2.3仙斬纜，即刻慘蝕1半；但如果昨日最低價2.3仙撈底，則去到收市3.3仙出貨，就有43%利潤落袋。呢類鏡頭，隨時繼續出現，恒指上落一二百點，對9045就有升跌四五成嘅效應。炒9045要留意，時日無多，大概重有5日左右買賣，恒指最後低過行使價10450（昨收10335），隻輪就只可以用嚟墊煲底。
另1個大跌大升嘅例子，係新地Call輪9115。最低5.9仙，跌45%；收9.4仙，則比最低反彈59%。正股（016）波動1.5元就令9115暴跌狂升。
9115下月中夠鐘，槓桿率61.7倍，溢價8.9%。正股到時要升到63.16元以上（昨收58元），揸9115先至唔使蝕，隻輪風險好高。
章 盛