噚晚香港各界婦女聯合協進會搞文藝晚會慶回歸，除咗必備嘅歌舞表演，重加插咗婦女界名人古裝扮相、旗袍catwalk同埋合唱環節，效果搞笑。
在強勁音樂之下，首先出場嘅係「女高官之首」梁愛詩，佢扮演王母娘娘，重有四個仙女散花。難得佢可以忍住唔笑，擺出好似法印咁嘅手勢。
跟住出場嘅范太更厲害，原本佢有得揀扮花木蘭，但係唔知點解，都係棄後生取老成，揀咗扮佘太君，化老妝一啲都唔馬虎，一出場重攞住龍頭枴杖耍番兩棍㖭！范太話扮佘太君好威嚴，但係喺立法會就唔需要咁威嚴喎。
王䓪鳴噚晚都係扮嘢一族，不過，佢嘅王昭君造型點睇都有啲怪，抱住琵琶出場忍唔住笑。佢話咁反映自己唔適合做四大美人喎。何超瓊扮珍妃，特首細佬董建成嘅太太扮武則天。聞董建成，太太喺屋企係咪溫柔啲？董建成哈哈大笑：「我冇咁講呀！」
噚晚闊太着嘅古裝都係問TVB借戲服，其實係邊個啱着邊套衫，就扮嗰個造型。至於旗袍catwalk，就多得「源」贊助旗袍，方黃吉雯着住一件純白釘珠旗袍，帶領名太出場，速度係慢咗啲，但係都好有睇頭。
傳真︰2623-9278
電郵︰