葉劉淑儀喺立法會辯論反恐法，態度強硬，承認「突一章」（即係加咗第十條落反恐法，第十條係聯合國一三七三號議案所無嘅，第十條對傳媒最有影響）；何秀蘭議員就話葉劉淑儀「突咗幾章」，不過唔肯認而已。
葉劉淑儀外貌蠻橫，只顧執法方便，故意忽略人權自由法治嘅觀點，但佢啲老友話葉劉平時多讀書，係有料嘅才女，非一般記者可比。佢喺立法會講咗一句好簡單嘅「為山九仞，功虧一簣」，即刻令到一啲年輕人不明所以，有人問左丁山點解。自己當然知道呢句話嘅意思，但已經唔記得出處，於是從書架上拎出一本《中國格言大成》（三聯書店，一九九○），搵到呢條。第一百九十頁講「為山九仞，功虧一簣」：語出《書經》，一仞就係七尺或八尺，簣就係盛載泥土嘅筐，意思係堆積到九仞高嘅山，只係差一簣而堆積唔成，用香港流行術語講就係「衰收尾，臨尾香」，文雅嘅解釋就係一件事情由於最後鬆懈，招致失敗，令人惋惜。
香港好多年輕一代唔認識四字成語，四十幾歲以上嘅人引用成語，就凸顯咗代溝，大家溝通唔到。以前左丁山唔多覺，不過自從久唔久有年輕人問左丁山一啲成語嘅意思後，先知道年輕人嘅中文常識都幾差。香港成日話英文水平下降，就冇人講「救救中文」，學校既然唔教，做家長嘅要多啲努力！