時勢唔同，八方早前都同大家講過，保留公務員身份嘅常任秘書長，雖然同七月一號前嘅舊局長同級，都係D8，但就未必有得出入坐寶馬。
回想九七風光時政府坐擁千億儲備，庫房滿瀉，當時眾高官所坐嘅豐田大皇冠不過用咗四、五年，政府就好豪氣咁幫佢哋換新車，一口氣買入二十幾架寶馬七系。而家問責制出爐，十一個局長坐定粒六分到架BMW，另外有八個資歷深嘅常任秘書長，好似七一前已經係局長嘅俞宗怡、羅范椒芬、尤曾家麗等都保得住駕寶馬。至於餘下五個新紮職者，好似眾人契媽李麗娟就因為靚車唔夠分，要坐重新征召入伍，車齡接近十年嘅大皇冠。
其實又唔賴得晒政府待薄班常任秘書長，最主要都係眼見經濟唔好，點敢開口問立法會攞撥款買新車，未被人鬧過咩？惟有委屈一下幾位新丁。所以話周德熙係有先見之明，否則連寶馬都要爭餐飽先有得坐，你話幾冇癮。
傳真︰2623-9278
電郵︰