盈富基金（2800）噚日突然暢銷，賣出1.01億個單位，現時只剩3600萬個單位，接近售罄。
有人話大戶估計美股噚晚會反彈，所以平定倉先，但亦有人話大戶掃盈富係為咗買貨質滙豐（005），將大市進一步壓低。噚日空軍大舉出擊，港股沽空金額超過9億元，超過大市總成交12％，係近期罕見。
前兩日股價才企定嘅歐亞農業（932）噚日再大幅下挫15.3％，收1.82元，成交1914萬元，拖累其他民企齊齊下跌，超大現代（682）跌7.4％；大成生化（809）挫2.7％；中國稀土（769）挫2.3％。
歐亞主席楊斌上個星期日先至來港澄清佢無神秘失蹤，股價稍為喘定。唔通佢離開香港後又再失咗蹤？
黑客收到料，傳聞中央隨時向民企進行大審查。阿虎認為無論傳聞係真定係假，大家玩民企都要小心啲。
得利集團（897）收購完位元堂後，股價一度虛火上升，但近日就開始有少少頭暈身熱，股價由高位9.7仙跌落5.3仙，累積跌幅達45%。
據聞管理層將宴請分析員，大力推介位元堂業務。位元堂最出名係養陰丸，不過就唔知養陰丸能否醫番好得利？
優能數碼（8116）噚日逆市急升25％，但連Cookie都話收唔到料點解急升。黑客話，據講幕後缺水，唔知係咪想推高股價抽水呢？
阿 虎