婦協晚會，唐英年局長嘅媽咪都有份表演華爾茲。八方多口問句，個仔做咗大半個月局長，媽咪畀佢幾多分？點知唐媽媽記得好清楚話：「七月二號到今日，啱啱半個月之嘛！」唐媽媽承認日日都好關心囝囝嘅新聞，佢重力撐唐公子話：「佢未講錯過說話，只有一次遲到兩分鐘啫。」
唐媽媽之前極力反對個仔做官，𠵱家就好接受現實，重警告話：「千祈咪行差踏錯！」唐公子話：「得嘞！我會小心。」媽咪鬧完又要為個仔心痛，因為唐公子晚晚忙到連飯都冇時間同媽咪食，只有星期六先至有機會。
咁，做局長係咪光榮呢？唐媽媽擰擰頭話，辛苦做都要有成績。如果唔係人哋就會拉你落台，佢更加擔心嘅係香港經濟轉型，囝囝好難做出成績來。個仔咁辛苦，惟有叫工人煲多啲湯水，畀佢補吓身啦！
傳真︰2623-9278
電郵︰