經紀陳本來同小初一樣生性愛冒險，鍾意炒股仔，但噚日竟同小初講，不如趁光大控股（165）股價低殘儲吓貨，嚇到小初以為佢轉咗性。
近日多間證券行出報告，話光控今年上半年冇沽過中國移動（941），又可能為旗下光大銀行作撥備，加上光大證券收入減少，因此調低光控盈利預測，搞到隻股近日跌唔停。噚日再跌1.9%，收3.825元。小初真係唔明，經紀陳鍾意隻股有乜好。
經紀陳解釋話，佢噚日睇報紙，知道光大銀行公布業績，上半年賺11億元。另外，雖然光控冇沽過手頭上5000萬股中移動，但以現價計都值唔少錢，加埋持有嘅現金，現時股價相當便宜。
佢重話光控想賣光大科技（256）重整業務，早排傳出同買家傾得好埋，雖然最終冇成事，但聽聞隻股重係放緊盤。
慕容小初