一味窩輪：新地輪有最威有最衰

隔晚美股嘅波動嚇怕人，恒指散160點，啲槓桿率大嘅窩輪，升跌更加驚人。新地（016）收58.25元，跌1.75元或2.9%。兩件有咁上下成交嘅窩輪，都打入最威榜同最衰榜。Put輪9127收22.1仙，升46%，最威榜上排第1。Call輪9115收10.8仙，散41%，最衰榜上排第4。
無論因睇淡新地而揸9127，或因睇新地會反彈而揸9115，到頭來都好有機會輸錢或輸清。
9127下月杪到期，正股若然跌唔落56.88元（行使價）以下，隻輪係咁先；正股要跌到54.67元以下，揸9127先至唔使輸。估計新地低過54.67元嘅機會唔係咁大，到最後9127都係變死火輪。9115下月中夠鐘，正股若升唔破62.25元（行使價），隻輪係咁先；正股要升到63.33元以上，揸9115先至唔使輸。估計新地升破63.33元嘅機會唔係咁大，最後9115都係變死火輪。

近期Call輪容易香
7月底至8月到期嘅Call輪，如果重有相當溢價，最好咪沾手。和黃Call輪有9件月底至下月到期，相信最終隻隻香，稍為勉強可能有得剩嘅係9097，不過機會都好細。
章盛