私房菜勁興，近來更成為議會話題。八方唔少老友都試過上樓搵食，連誤將「節瓜當絲瓜」嘅小超人李澤鉅也為嘗嘗天下美食，用五萬元包下「董家菜」，同朋友食餐一圍「紅樓宴」。據知小超人食過番尋味，但此舉搞到其他客人抗議，因為佢一包廳，大家就無得食。於是小超人想到妙計，希望誠邀董師傅上佢隻遊艇做廚。可惜師傅喜歡與客同樂，同各方朋友共享美食，而婉拒咗佢嘅好意。
「董家菜」師傅董兆忠煮得一手出色嘅揚州及上海菜，如八寶鴨、醬汁肉等。佢喺中環創店以來，有不少知名食客，老董未做特首時，都成日幫襯。雖然兩家人都姓董，但聞說佢哋應該無乜關係。其他食客重有董建華個細妹、陳方安生媽媽、周潤發、「老查」金庸等。
「董家菜」有幾吸引？董師傅個女同八方講，前兩三個月中央派人來港，洽商佢爸爸做國家領導人包括主席江澤民嘅「御廚」，但規定佢唔可以喺上面開舖。而董師傅都係鍾意留喺香港，單嘢最終都係傾唔成。
講咗咁耐，大家似乎都想一試佳餚，可惜董師傅有腳傷，𠵱家喺上海針灸休養，睇怕要月底先可以再「開爐」。雖然近排私房菜俾人鬧無牌，但「董家菜」已經上咗岸攞咗牌。呢位董生咁受歡迎，唔知到幾時先輪到我哋個特區董生呢？
傳真︰2623-9278
電郵︰