萬事得嘅生意順遂，回饋業內人士，捐出兩個暑期獎學金，畀報販子弟申請，兩位得獎者可獲保送往英國修習英語，雖然係短期上課，但係報販子弟有此機會，實在十分難得，左丁山一於話佢好嘢。希望佢繼續有錢，年年捐暑期獎學金，甚或捐獎學金畀報販子弟讀大學，善有善報㗎，李嘉誠話「愚昧是世上的最大敵人」，多啲人讀書，愚昧就有機會減少，甚或被消除，捐錢畀學生讀書，係最好嘅慈善行動。
前幾日聽一位院長講，原來大學生去英美讀暑期課程，極有效果。一啲學生去哈佛讀暑期班，修兩科都攞A，到畢業求職嗰陣，釘埋張哈佛暑期班證書落CV度，果然收效，打動僱主之心，而申請英國碩士課程，亦有好處。院長話：「唔係人人去哈佛讀暑期班嘅，最多學生喜歡UCLA，大概鍾意校園位於市區，交通飲食方便，容易去迪士尼樂園、環球片場、荷李活，一邊讀，一邊玩，好快樂啫。」最怕係玩到癲得滯，唔記得讀書啫。
但唔係人人都有錢去歐美讀暑期班嘅。一啲有錢嘅院校有助學金，畀一半，其他一半由學生家長負擔。畀一半都好好嘅嘞，大學生到歐美既可上堂，學好英文，又可結交朋友兼遊覽，好過癮啫。萬事得大發善心，為培育報販子弟嘅英文而盡綿力，做得好啱。