鍾鎮濤（阿B）與前妻章小蕙（Teresa）共同欠下裕泰興財務二億五千萬元，由於無力償還欠債，阿B日前已委託律師向法院申請破產，他的好友張堅庭、陳友和周潤發昨日得知後，都表示十分同情他，並希望阿B可以重新振作。
周潤發曾與阿B合演電影《殺妻二人組》，他說：「今日睇到報紙先知呢件事，阿B喺娛樂圈努力咁耐，𠵱家搞成咁，又真係幾令人為佢傷心，希望佢可以咬緊牙關，捱過呢一劫後，重新做人。」
與阿B同是溫拿五虎成員的陳友，昨日在電話中說：「𠵱家只希望阿B可以順利申請破產，同時希望啲債主可以畀條路佢行，每個人都會有唔同際遇，佢喺邊度跌低就喺邊度爬番起身！我相信阿B咁做係迫不得已。」
而曾與阿B合作電影《表錯七日情》的導演張堅庭，在接受電話訪問時說：「阿B咁做都幾可惜，不過我覺得佢反正冇能力還呢筆錢，應該再早啲申請破產，咁就唔使成日為呢件事擔心。將來一樣可以東山再起，最緊要唔好失去信心。」