英皇小花、3T之一嘅Yumiko（鄭希怡），佢嘅新歌《相對濕度》噚日已經派台，而英皇都幾有噱頭，派歌時送一張YumikoQ版十六格漫畫插圖，Yumiko喺漫畫中係一個蝴蝶仙子嚟㖭。
噚日Yumiko去港台接受訪問，佢話：「公司都冇特別話唔畀我拍拖，又或者要我減肥。我日日都要排舞，唔食飯就撐唔到。」呢排Yumiko不停為新歌排舞，一日跳足十個鐘頭，𠵱家已經練到有四嚿腹肌。
Yumiko係3T小花中第一個派歌上台，另外兩位小花Mandy同Maggie之後陸續有新歌推出，到時會同Yumiko一樣，都有Q版漫畫造型。而喺佢哋下月推出嘅新碟入面，就會有三小花完整嘅漫畫愛情故事。
陳嘉輝梁小冰兩公婆同奇鋒婚紗簽約做年半代言人，噚日佢兩個喺尖沙嘴影硬照，影埋今日就搞掂，而每日要換十幾套婚紗。小冰對酬勞好滿意，佢兩公婆每人重各收一份，具體有幾多就唔肯講。小冰影相嘅時候，心情好興奮，個樣重靚過同陳嘉輝結婚嗰陣。
韓國有線電視同衞星電視電影頻道OCN，過去兩個月針對多個電影網站進行一項「古今內外一百部名片」調查，結果韓片《生死諜變》以總票數嘅五分一、約一萬二千票成為最受歡迎電影，而周潤發主演嘅《英雄本色》則排第四十七，成為港產片之冠，至於剛喺韓國上映嘅《少林足球》，就排第五十二位。
吳文忻、楊羚、樊亦敏噚日喺尖沙嘴，為有線電視舉行嘅「2002香港兒童競選大賽」活動，擔任評判。
吳文忻話睇報紙知道鍾鎮濤申請破產，但佢從來都唔擔心自己會變成負資產。皆因佢一來唔買樓，二來又唔會拖卡數，而所有賺番嚟嘅錢，佢都存入銀行做儲蓄。吳文忻重話雖然𠵱家銀行利息低，但勝在夠穩陣嘛。
蒙嘉慧噚日返無綫電視城開工拍《衛斯理》，佢話拍呢套劇有啲難度，因為佢演嘅白素要識打交，但偏偏佢就係唔識，於是一班武指好畀心機教佢，為咗唔令人失望，佢就喺屋企對住塊鏡練習，佢話：「個武指話唔識打唔緊要，最緊要係識撻，撻得有型，所以我咪喺屋企練，要練到跌都型過人。」
傅明憲噚日到尖沙嘴星光行商務印書館，出席佢老友黃惠婷本新書《大美人》記者會，佢重幫老友喺書中寫序。而傅明憲就同馮仁昭講，佢嗰本新書《有狗萬事足》已經喺六月出咗街，雖然佢自己一向唔睇銷量，但今個禮拜六佢會喺書展搞簽名會，到時順便宣揚保護動物。
成龍啱啱獲美國《People》雜誌選為中外一百位最偉大影星之一，重係唯一一個入選嘅華人影星。成龍噚日喺美國打電話返香港，話冇諗過自己會當選，所以好開心。講到近況，成龍話佢啱啱拍完《贖金之王》續集，遲啲會拍個廣告。
鄧小艾上星期三（十日）喺嘉諾撒醫院開刀誕下男嬰後，經過幾日嘅休息，已經喺噚日朝早出院。本來醫生諗住今日先至畀小艾出院嘅，但噚日醫生見小艾個傷口愈合得好好，所以就提早一日幫佢拆線。而小艾嘅男朋友張文聰就喺朝早九點幾，做柴可夫揸車送小艾同BB返屋企。