立法會上周啱啱開完大會，一眾議員隨即去咗黃宜弘（圖）喺東莞嘅「俱樂部」耍樂，大家都盡興而歸。究竟黃宜弘個竇有幾吸引？有份去同歡嘅蔡素玉形容到好誇張，「嘩嘩嘩」咁話嗰度富麗堂皇。
八方聽落先知，誇張嘅唔係蔡素玉，而係黃宜弘間豪宅。話說佢間屋成四萬呎咁大，有三十幾間房、五十幾張按摩床椅，重有健身室、卡拉ＯＫ、桌球室、桑拿房……客房嘅廁所都有成二、三百呎，大過香港一個主人房。黃宜弘又電召咗十幾個女郎等候議員大駕。大家唔好心邪，班議員唔係「北上尋歡」，只係想享受按摩師嘅專業服務。
蔡素玉玩樂之餘感觸良多，皆因大陸物價平到你唔信。佢話自己香港間屋千幾呎，裝修使咗百三萬，黃宜弘呢間豪宅四萬呎地方只係用咗百七萬。
佢自己有盞六千幾嘅西班牙進口燈，見到黃宜弘有盞鬼火咁靚嘅燈，只須四百幾，其他房嘅燈更只費一二百，都好羨慕。
傳真︰2623-9278
電郵︰