已故歌后鄧麗君嘅赤柱豪宅可能要拆，因為佢阿媽同細佬已經將物業委託中原地產以招標方式出售，8月20日截標，市場人士話物業市值約5500萬。
鄧麗君生前在港就係住在赤柱佳美道18號呢間大屋，佔地7150方呎，間屋實用面積就約2614呎，由佢媽咪同細佬透過有限公司持有，88年買入價只係700萬。由於嗰度嘅地積比係0.75倍，換句話說重建可以起到一間3層高5300幾呎嘅海景大屋，加上區內無同類放盤，都會吸引到買家興趣。
聽講鄧麗君細佬鄧長禧好想賣咗間屋套現，搵間大啲嘅屋做展覽館，故居地方一來太細，同時位處私人住宅區，人流太多始終唔係咁方便，唔想騷擾住喺附近嘅鄰居。
舊年物業都曾暗盤放過吓，叫價6000萬，但賣唔出，今次就打正旗號，可能結果會唔同。假如真係賣得出，對於歌迷嚟講，以後就唔可以去赤柱憑弔。
南區不嬲多名人住，鄧麗君隔籬嘅20號，就係老牌家族永興隆嘅祖屋，幾十年都唔放，又如赤柱村道47號嘅大屋，業主現代美容老闆曾裕雖然話放售，但叫價成1億3，間屋7000幾呎，有成20幾間房，都幾難搵到合適嘅買家。
鄧麗君原名鄧麗筠，53年1月台灣出生，95年5月在泰國清邁逝世，享年四十二歲。昔日名曲包括《小城故事》、《漫步人生路》和《但願人長久》等等。由於鄧麗君最喜愛粉紅色和米色，故她位於赤柱的故居，亦以這兩種顏色為主。鄧麗君生前與法籍男友Paul一直在赤柱故居居住，阿Paul在鄧麗君過身後大半年才離開。
前年鄧之故居曾開放一年，吸引咗7萬人次參觀，甚至成為遊客嘅熱門旅遊景點㖭。其家人並將開放籌得的二十多萬款項捐予保良局。對於故居再次放盤，鄧麗君文教基金會的韓小姐昨日表示，去年8月已經有此決定，改作紀念館不大方便。
都市人生活節奏緊迫，工作又繁重，在家最緊要休閒，新地馬灣珀麗灣，用成兩億銀整咗兩個大型會所，設備統統係休閒至上。兩個會所夾埋成100萬方呎，各有獨立主題。為咗加深市民對呢兩個會所嘅認識，新地重整咗份類似飛行棋嘅跳棋遊戲介紹兩個Club，會喺開放示範單位時派發。
以海豚做象徵嘅藍色會所（BlueBlueClub），代表住戶可隨時隨地接觸海洋。會所裏面分21個主題區域，例如小小水世界裏面嘅大型水族館、浸浴池、泡泡池，當然唔少得皇牌設施香薰小木屋啦。屋苑高級策劃經理劉志傑話，馬灣地利條件就係有海有大自然，所以會所嘅概念就係要令住客有「洗滌心靈」之餘，又要有家庭樂兼健康感覺。
另外一個係綠色會所（GreenGreenClub），攞蜜蜂嚟做象徵，意思係親親大自然，裏面嘅主題區域重勁，有成26個。最特別係有動植物公園，係新地發展咁多物業以嚟，從未有嘅設施。真係有啲「迷你海洋公園」Feel噃。
之不過，馬灣島北面原本有個「雪樂園」就擱置咗，有成12.1公頃，政府準備最快今年10月內公開招標，可建總樓面52萬方呎，建築物最高20米，預計明年首季公布中標得主。
蘭西
電郵地址：