「喂，你三日後得唔得閒？」
「想點？」
「冇，我結婚之嘛，想搵你幫手做證婚人。」
「吓?!講笑定講真？做乜無端端結婚咁無先兆？」
「阿太話不如結婚，重原來已經定咗喺禮拜四，我本來話嗰日唔係太得閒，因為通常禮拜四都有新戲上畫，我想去睇戲。」
「結果呢？」
「結果係禮拜四結婚，你究竟得唔得閒做證婚人，最多簽完字後我請飲茶！」
以上是我與彭浩翔在去年的一段對答，當時準備結婚的阿彭，今日已為人夫，重要係順風順水、無驚無險，睇嚟做人老公做得越做越過癮。
阿彭算得上係一個非常實際的作者，為了寫某啲嘢，他會專誠去學；又或者如果他學了某啲嘢，他又必定會將嗰啲嘢寫番出嚟。阿彭由未做人老公到做人老公，由唔知點做人老公到學做人老公到𠵱家做人老公好似做得幾成功，這麼的蕩氣迴腸，那麼的哀怨纏綿，阿彭又點捨得唔將之一點一滴地寫出嚟，結果他寫了一個名為《婚前婚後三分險》的專欄，如今更已結集成書，讓我可以一口氣去體會他的心路歷程。
左看右看阿彭也不像是一個好老公，但字裏行間卻感受到他的婚姻生活愉快甜蜜兼而有之，關鍵是阿彭嫂好嘢（書中稱為老闆），她美麗醒目、識做兼身材好，除了是阿彭的好老闆之外，最重要的是她懂得欣賞阿彭，二人表面上是夫妻，實際上是一對知己好友。
「有一對男女朋友讀者分別電郵給我，說看過了我的文字後，對婚姻產生了更大的信心，相信不久的將來，他們便會結婚。」阿彭說。
「作為一個作者，相信這已是除了金錢以外最好的回報。」我說。