中銀香港（2388）上次遇正911事件，需要押後上市計劃，今次上市又遇上美股與美元不穩，周一杜指一度挫逾400點，標普期指噚日亦曾挫逾20個大點，中銀香港似乎都幾黑仔。雖則話中銀香港國際配售已有數倍超額認購，但暫時只係篤手指，隨時可以打退堂鼓。
淡友見美股唔妥，已經有所部署。港股噚日挫160點，收10421，成交64.44億元，其中有12.7億元來自滙豐（005），滙豐沽空成交高達4.47億元，其實滙豐連日都俾人空襲，累積嘅空倉唔細。
黑客提過有啲莊家缺水要出貨，甚至可能被迫倉，話口未完，噚日即刻見華聯國際（969）爆煲，一度勁挫75％至0.50元，收0.67元，跌66.3％。傳聞呢隻股由0.74元水平炒上，一直左手交右手，高見2.30元後，已經無以為繼，由於無散戶捧場接棒，惟有出貨任由股價插水。
長江生命科技（8222）首日上市，未有如傳聞般抽高至3元以上，早前傳出有10萬股在暗盤市場以3.30元成交，但亦未見有上板，反映之前好多傳聞都係吹水。
此股全日在2.10至2.275元上落，收2.15元，雖然仍升7.5%，但表現唔算理想，其他生化科技股亦紛紛下挫。
不過，黑客話長科上市，投資者換馬，其他生化科技股自然被拋售，噚日個市咁差，但長科仍能穩守，反映街貨差不多盡落入強者手中，根據tom.com（8001）上市時嘅玩法，相信長科好快就會挾上。
阿虎