百五萬港紙可以買啲乜？洋樓？跑車？全部都唔係，答案係德國龍門簡尼喺今屆世界盃決賽用過嘅手套。
話說喺當日嘅比賽上，簡尼因為甩手而俾朗拿度射入，結果德國就以○比二輸波，並且造就巴西第五次成為世界盃冠軍。賽後，簡尼嬲到將手套除咗扔喺地吓，但唔知點解，就俾一位巴西球迷佩雷拉偷偷哋執咗，而佢重喺前日向巴西傳媒炫耀自己嘅戰利品。
佩雷拉話如果有人出得起二十萬美金（約百五萬港紙），佢就割愛咁話。之但係，我求大俠就唔係太睇好有人畀錢佢賺。𠵱家經濟環境唔好，球會冇錢買大牌球員，球員又俾人減薪，邊會有人願意用百五萬嚟買一對龍門手套呀！
大名鼎鼎嘅高球好手「老虎仔」活士邊個唔識，但有時啲嘢唔係指住個鼻就大晒㗎，好似噚日呢位仁兄去蘇格蘭嘅賽會備戰英國公開賽，就因為冇帶球員證，賽會嘅保安企硬唔畀佢入場，事後賽會保安部重行出嚟講，話之你係碧咸抑或活士，總之冇通行證就冇面畀。今次真係應咗個句「面係人畀，架就係自己丟嘅」！
咪以為靚仔先至吃香，好似車範根父子咁，一樣咁受啲廣告商歡迎。聽講車範根父子同SK移動通信公司嘅廣告代理商簽咗一份為期半年、總值五億韓圜（約三百三十萬港元）嘅廣告合約。雖然車範根父子冇安貞煥咁靚仔，但係就勝在名氣夠有實力，所以一樣大把人搵佢哋拍廣告。
紐卡素新簽返嚟嘅葡萄牙中場維拿，話會帶埋佢阿媽去英格蘭，咁樣佢就可以食到葡國家鄉飯餸。但我求大俠就認為，有阿媽喺身邊，冇咁易會學壞。事關係人都知紐卡素陣中都有幾匹野馬，如果冇阿媽睇住，好易變壞呀！