本報月前報道罹患末期肺癌的七十歲老翁吳健華，盼在離世前見鄉間妻兒最後一面，蘋果日報慈善基金撥款助他償願，其居於潮州的長子現已來港與他團聚。吳伯坦言最後心願已了，再無牽掛。
「太太係鄉下婆，未見過世面，始終唔敢落嚟。不過個仔嚟咗我已經好開心，佢日日嚟醫院兩、三次陪我，真係好乖仔。」插上氧氣喉的吳伯以微弱的聲線說。
吳伯的二十九歲兒子青雲，對於要在這樣的情景下父子團聚，心裏實在難過得很。他說：「醫生話爸爸鍾意食乜就買畀佢食，𠵱家已經唔使戒口，我有時會買啲牛腩、豆漿同埋生果畀佢，不過佢都冇乜胃口食。我都有心理準備爸爸唔捱得好耐，佢都交代晒啲身後事。」
吳伯年前不幸患上肺癌，病後辭去製衣廠工作，依靠綜援金度日，獨卧病榻的他倍加思念親人，惟卻無法負擔妻兒來港旅費，遂向本報求助。蘋果基金撥款五千元助他完成心願，近日另將善長捐款合共一萬四千三百三十元，交予吳伯簽收。
「我對善長同蘋果日報嘅幫忙表示感謝，啲錢會留番畀個仔喺呢度嘅生活費，同埋用嚟搞我將來嘅身後事，唔使畀屋企人咁大負擔。」坦然面對生死的吳伯說。
捐款編號：C0562
暖流熱線
電話：29908688
傳真：23702192
電郵：
網址：