菠蘿肉除咗含豐富維他命C之外，更有助增強食慾及幫助消化，夏天至啱食。
我至怕要自己㓟菠蘿，所以每次只會選擇已去晒皮嘅菠蘿至會買。
炎夏一到就容易食到呢啲去咗皮嘅菠蘿，唔使自己煩，十蚊就有交易，都算抵，買返去浸鹽水就食得。
臘腸斑又有另一個好聽嘅名，叫做桂花斑。呢種魚唔係話成日會有得賣，係夏天呢幾個月先至多啲，所以見到都要買啲試吓。
臘腸斑大約重二斤左右，最當造嘅時間係七、八月。臘腸斑啲肉都幾嫩滑，不過皮就較嚡口，但清蒸之後都好正。
最近我肥師奶見到有款來自德國嘅Beautea健康茶包，原來呢個品牌嘅茶不含有興奮刺激作用嘅茶鹼，原料都係天然茶葉同有機物質。呢隻牌子有七種茶包選擇，喺日本、美國同東南亞都好受歡迎。最受歡迎嘅係減肥綠茶，而我就鍾意去毒活血綠茶，佢嘅士多啤梨加呍呢拿香草味夠香甜。茶包有單種口味盒裝，和有齊七種味道嘅試飲裝兩種。
唔係好多人好似我哋呢啲入廚經驗豐富嘅師奶咁，話咁易就可以將蛋黃同蛋白分開，又或者直接可以準確將調味料份量量好，呢個時候便要一啲小工具幫幫手。
但隔蛋電同量匙呢啲小工具雖然有用，但大公司賣到成幾十蚊一套就有啲貴。好彩我肥師奶眼利，見到呢套隔蛋器連量匙的套裝，只係賣十蚊套，非常實惠，所以都買咗套畀我廚藝無咁精嘅細妹用。