雖然話𠵱家日本中型轎車銷量大不如前，買家寧願用二十零萬嘅價錢去買部歐洲車，因而令近年日本中價車銷量大跌，之不過仍然有人憧憬日本中型轎車，銷量會逐漸回升咁話。繼萬事得推出全新配用2.0公升偈嘅Mazda6之後，另一邊廂嘅日產亦有計劃響新款Elgrand之後，再度引入全新Primera車系；咁又係嘅，家陣日產只得一款Cefiro2.0公升型號，雖然照顧到一班追求豪華舒適感嘅用家，但就流失唔少講求駕駛操控性嘅Fans，以Primera舊有佳績，確實有生存空間㗎！不過，原有日本2.0公升車賣二十零萬嘅歲月已經風光不再，就連剛推出不久嘅Mazda6銷量亦未見突出，睇嚟Primera嘅定價，會係銷量嘅主要關鍵噃！