美股終出現恐慌性拋售，周一杜指曾經急挫440點，低見8240，逼近911事件的8062低位，但尾市的1小時，卻戲劇化地由低位強力反彈，結果杜指收市僅跌45點，納指更倒升9點。美股劇烈波動，投資者信心已受損，亞太區主要股市噚日亦大幅回落。
美股能夠由低位急彈而上，咁有力度，本來係好現象，證明低位支持力強，且吸引實力買家入市。不過，投資者唔係咁諗。近日大企業陸續爆出假帳醜聞，加上美元弱勢到可能會硬着陸，已令到投資者信心大失，普遍認為美股重未跌完。好似呢種信心市，極度受消息左右，大升又得，大跌又得，完全冇方向可言。前日雖然彈得番，但唔保證日後唔再插過。
港股噚日好大程度上就反映咗呢種心態，所以低開之後就一直冇力反彈，結果都係低收，恒指報10421，跌160點，成交64億元。大藍籌股備受壓力，長實（001）、和黃（013）同新地（016）都跌成3%；滙豐（005）收87元，跌1元，相比外圍表現已算硬朗，但滙豐拋空量大，除非有極大力量扭轉頹勢而引發補倉潮，否則前景仍未能樂觀。
長科（8222）上市，生不逢辰，高開2.275元後就反覆向下，結果低收2.15元，投資者仍有利可圖。長科發售13億股，噚日成交已有6.6億股，半數股份已轉手。呢輪個市咁淡，相信暫時唔會有炒家上車，所以，噚日嘅貨源，應該係落在強者手中。有消息話今次售股，無論配售同公售，都比預期分得為散，唔排除強者會用多幾日收集，到貨源歸邊後才做工夫。
第一龍浩（875）升勢一發難收，0.2元樓下略作整固後，又再破位而上，噚日衝到0.265元後，回收0.255元，仍升0.7仙，成交7877萬股，動力依然強勁。
龍浩主席日前話會引入策略性股東，消息指好快會落實，大陸資金近日仍大手吸納，必有智珠在握。
郭兆誠