馬來西亞Malaysia
別注潛點Course1
有時除咗羨慕天上海鷗可以避開陸地煩囂外，潛入水世界避開地上嘅人和事都不失為一個好選擇。事實上，正值香港暑假時分，潛水位選擇真係買少見少，因為時值風季，除咗風高浪急時出海帶有一定危險性外，亦會因為海水同時變得混濁而使水底清晰度大大降低，最緊要係錫住你嘅荷包，又要揀一啲Cheap而不「行」嘅潛水位畀你，好彩𠵱家至9月位處馬來西亞嘅詩巴丹Sipadan重係潛水好時候，而且除可睇大魚，重可以探望海龜大家族，睇完呢版好執定架生起行啦！
文：朱維達
詩巴丹最吸引之處當然係佢嘅藍色世界，帶住個「世界十大潛點之一」嘅銜頭已經知道此地並非浪得虛名。事實上，今次嘅潛水之旅亦絕非兒戲，並非單單帶住至少四、五十磅嘅潛水器材睇魚睇珊瑚，原來呢度最出名嘅，就係睇海龜！
唔似其他地方，要定時定候喺海灘伏住等海龜媽媽上嚟產蛋，重要圍晒欄杆隔離觀賞，辛苦得嚟又無癮！詩巴丹簡直係一個海龜島，幾乎每晚都有海龜爬上沙灘產蛋，龜媽媽為防範龜蛋被雀鳥偷食，會將佢哋埋喺沙內，島上負責人則會將眾龜蛋放入鐵絲網內，慎防被遊客踩爛，但真係要奉勸一句（尤其係我哋香港人），應該盡量避免騷擾佢哋生活，睇到Cutie嘅龜BB喺沙灘處「慢」步，千祈唔好威迫佢哋同你影相，始終都要以保護大自然為首務，如果唔係呢度就好快變咗歷史遺迹！
詩巴丹Sipadan位處馬來西亞沙巴州（Sabah）東南，從香港出發路程其實頗刁鑽：
香港→3小時機程到哥打京那巴魯KotaKinabalu（KK）→1小時轉機到斗湖Tawau→2小時車程至Semporna→30至45分鐘船程抵達詩巴丹Sipadan
前往KK可以選坐港龍或馬航，不過建議去程選乘港龍，因為港龍逢星期二、五、日從香港出發，經過長途跋涉嘅旅程後仍然可以即日抵達Sipadan，第二朝可以即刻潛水；若果你選乘馬航，則只可以喺KK或Tawau住一晚後先到Sipadan，無形中浪費咗一日大好光陰！
回程時，你亦要留意，若果你返到KK時係星期一、三、四或六，則建議乘坐馬航，可即日返回香港，咁就可以真係玩盡成個假期！當然，若果你同Honey有個更悠長嘅假期，想停KK多幾日繼續浪漫之旅，就唔使理我講嘅嘢啦！
除咗喺沙灘見到龜迹，潛入大海一樣見到龜家族！原來任何日子及時間潛入大海中，都會見到為數二、三十隻，隻隻有成圍枱咁大嘅海龜喺你身邊經過，原來喺DropOff（即有突然下墮地勢）地點下面，就係其中一個必潛熱點──龜塚TurtleTomb，水深處約60呎，其後龜塚地勢會上升30呎，不少海龜在此流連，但同樣有很多海龜殘骸，究竟係海龜迷路抑或佢哋選擇於塚內了結餘生至今仍是個謎，以往亦有因潛水者於塚內迷路，以至耗盡氧氣的死亡個案，所以呢區只係適合有洞潛牌嘅朋友進入。
不過除咗海龜，DropOff位附近當然亦有唔同種類嘅海洋生物，而且除碼頭嘅棧橋JettyDropOff同上述嘅龜塚TurtleTomb，環島各地方都可以沿沙灘直接步入大海，而且各潛水位都有唔同景觀，例如另一受歡迎嘅南角嘴SouthPoint正喺碼頭嘅另一邊，呢度嘅海狼群就最為壯觀，至於其他位置則有成千上萬嘅魚參魚、蝙蝠䱽，以至鐵頭魚，唔食肉嘅豹紋鯊都有機會一睹其廬山真面目，一次過睇唔晒？無相干，潛多幾次咪得囉?!
肉痛？唔使肉痛！呢度其中一樣最吸引嘅，就係唔似其他地方逐次潛水逐次計錢，只要你有時間、有氣又有力，由朝潛到晚都係計一次錢，真係勁抵玩！島上嘅AbdillahSipadanParadise度假村提供簡樸潔淨嘅酒店設施，你可從度假村嘅聯絡公司查詢當地潛水資料，亦可從香港買個Package，唔使煩嘛！
查詢機構：AdventureJourneyWorldTravel（Borneo）SdnBhd
地址：GroundFloor,Lot5,BlockA,TamanFortunaShoplots,JalanPenampang,P.O.Box12248,88825KotaKinabalu,Sabah,Malaysia
電話：（60）88-223918/224918
傳真：（60）88-248331/258105
電郵：
簽證： 持BNO、特區護照者遊馬來西亞免簽證，CI持有者則須辦理。查詢：28210800（馬來西亞領事館）
套餐： 可購買6日5夜詩巴丹潛水Package，價錢$8,650已包括由香港至詩巴丹嘅所有交通配套、早午晚餐、酒店住宿、潛水器材等，旺季附加費$500（現在至8月31日）。查詢：29261668（SunnSeaHolidays），網址：