好耐冇見波鞋街Sales訴苦Sam，早兩日旺角街頭巧遇，講起波鞋街巿況，生意依然唔錯。
訴苦Sam：「都係多得班賣假貨嘅波鞋佬，佢哋𠵱家去晒商場散貨，唔敢入嚟波鞋街搞搞震，搞到𠵱家班波鞋兒童唔敢幫襯商場舖，一定要嚟波鞋街至有信心。所以你話係咪多得班假貨商人喇？」訴苦Sam繼續：「𠵱家商場舖只做到遊客生意，除咗啲老牌舖，好難做到本地客生意。」
咁咩遊客幫襯班賣假貨嘅商場舖呢？訴苦Sam話以日本客最多。「幾個月前，日圓弱勢，香港人牙擦擦話要趁火打劫過去買AV產品，𠵱家風水輪流轉，美元弱勢，日本仔重唔過嚟報仇咁報咩？不過唔熟地頭就中晒招，走去商場舖幫襯假貨佬買波鞋，幾百蚊買到『科時』以為執到寶，點知買咗假鞋都唔知。呢次都算螳螂捕蟬，黃雀在後，假貨佬變晒黃雀，專食遊客。」訴苦Sam又在訴苦。
主持人：大食Jack
八卦熱報：