長江生命科技（8222）挾超人之名，首日表現都不外如是，確實令小初失望，好彩小初唔係分到好多，噚日又冇撲落市場買貨，所以計落都叫做略有微利。
經紀陳噚日心情唔多靚，皆因佢有兩隻股仔揩嘢，其中一隻就係表演笨豬跳嘅華聯國際（969），噚日隻股急挫66.3%，收67仙，但怪就怪在成交唔太多，只得820萬股咁大把。
經紀陳話，一日都係怪自己太貪心，唔識落車之故。今年隻股有個台資炒家搵到新水，氣勢亦當堂唔同晒，由1.20元至1.30元水平一路炒上嚟，佢跟風上車，帳面曾經賺過唔少錢。原本佢見隻股近日成交細咗，都諗住沽貨，點知隻股噚日突然急插，結果走唔切。
經紀陳話，聽聞大莊最近搵到人要咗大手貨，所以唔再維持秩序，導致股價急跌。
慕容小初