各位喜歡高性能車款嘅車迷，記住留意喺今年9月舉行嘅法國巴黎車展喇；事關富豪繼於2000年巴黎車展上，展出一系列高性能概念車後，佢哋又會喺今屆車展會場內展出全新S60R及V70R高性能型號，以吸引車迷注意。
截至現時為止，廠方只公布咗S60R嘅資料及相片，但廠方新聞稿中指出V70R將會採用類似S60R嘅設計，同埋走高性能路線；講番部S60R，喺外觀上會與現有S60型號有所差異，當中車頭部份會設有大型生風導入口，可有助改善引擎散熱，另外重有全車擾流器、Bi-Xenon頭燈，以及四輪闊大跑車合金軨，令其高性能跑車形象更見突出。車廂內部嘅布局亦略作修改，當然唔少得重有一雙跑車桶形座椅啦。
而佢所採用嘅一台2.5公升Turbo偈，馬力輸出高達300匹，難怪新車0至100公里需時僅5.8秒，極速更可達250km/h咁快啦。經強化嘅底盤加上一套跑車化懸掛組合，亦能令新車有更出色嘅操控表現。新車可望於2003年初投產並以限量形式發售，相信屆時又會掀起一陣搶購潮喇！