新登場：
街坊小館品嘗創意上海菜

踏入八月份，將軍澳地鐵站正式通車，交通方便，人流自然多，人流一多，食肆當然少不得，有人深明此道，早在通車前就在地鐵站附近開設小型上海菜館，別以為做街坊生意的，就只得一個平字，除了價錢大眾化，最大賣點就是傳統與摩登集一店，這裏有傳統的菜式，亦有由大廚的創新配搭，加上摩登格局，完全跳出了傳統的框框，以後食上海菜又可以多一個選擇。

記者：黃婉冰　攝影：黃子偉

賽螃蟹炒年糕$32
賽螃蟹今回不再孤軍作戰，有煙韌年糕相伴，在外形與味道上徹底改變。年糕淡而無味，所以需要先用上湯煮至入味，賽螃蟹經大廚快手炒成軟滑粒狀，再加入年糕兜勻，撒上金華火腿絲、生雞蛋黃，食時撈一撈便可。

試味報告：賽螃蟹的軟滑與年糕的煙韌，兩種口感形成強烈對比，蛋白同年糕本身味道都偏淡，所以最好夾少少金華火腿一齊食，可以吊一吊味。

午市套餐$24-$30
食店主要做街坊生意，所以午市套餐都會以抵食為主，迷你砂鍋雲吞津白加排骨菜飯，再送多一杯鮮豆漿，一人份量啱啱好。大廚選用新鮮嫩雞仔、金華火腿、上肉及自製上海雲吞等，一次過原鍋蒸熟，鮮味唔會流失，湯料又唔會變得溶溶爛爛，一舉兩得。菜飯就用白菜同菜湯同煮，可令飯粒充滿菜香。

試味報告： 雞湯唔肥夠清甜，啖湯有清香雞味，雲吞比傳統的迷你，可以一啖一隻。菜飯足料，菜味十足，排骨炸得鬆化軟熟，味道與口感都好好。

海鮮石榴球$38
外表似叉燒包，但比叉燒包精緻的是改量版石榴球，外層是薄如紙的煎蛋白，裏面是炒過的鮮魚肉、蝦、叉燒、雞肉、甘笋等各式材料，餡料比傳統的多，包出來的亦較大，用上湯做芡汁，味道清而不油，是濃味以外的另一個選擇。

試味報告： 蛋白夠薄，材料豐富，外層蛋白皮滲着上湯汁，清清哋，味道一般，但論包製功夫，不得不記大廚一功。

彩絲生菜包$38
食上海菜，都可以有清新選擇，這款由大廚自創的生菜包，內裏全是清怡爽甜的配料，芒果、黃椒、西芹、豆腐乾、雞肉，全部先灼熟再過冷河，用的骰生菜葉包着凍食，餡料五顏六色，與傳統又濃又膩菜式截然不同，作冷盤或頭盤最啱炎炎夏日。

試味報告： 入口清涼，香甜芒果味首先跑出，跟住係唔同材料嘅不同口感和味道，無傳統生菜包咁啖啖肉，但勝在味清甜，似西式雜菜沙律，中西合璧，幾特別。

回鍋豬頸肉$36
傳統回鍋肉被女士們拒諸門外，肥騰騰嘅豬腩肉係罪魁禍首，大廚深明此道，故改為豬頸肉。豆瓣醬經過後期加工，混入鮮紅辣椒茸以增加香辣度，以最傳統的配料如葱段或青蒜、豆腐乾等同炒，未食已聞得豆瓣香辣味撲鼻。

試味報告： 無過多肥淋淋的豆瓣醬汁，每片豬頸肉只會好均勻咁蘸滿豆瓣醬，汁香而不太辣，夠惹味，豬頸肉爽滑，無多餘肥油，食完唔覺好油膩，夾着葱段食更香口。

紅豆雪糕綠茶小丸子$16
紅豆冰、雪糕、湯圓想一次過食晒的話，呢款紅豆雪糕綠茶小丸子就可滿足晒你三個要求。紅豆煲到起晒沙，配以香滑呍呢拿雪糕同綠茶味小丸子(即無餡湯圓)，三種味各有特色，老闆話呍呢拿雪糕味道較淡，伴紅豆食最滋味，自製的綠茶小丸子全加入了綠茶粉，健康清新。

試味報告： 小丸子煙韌有咬口。涼浸浸雪糕加起沙紅豆粒，一陣涼快感覺直衝喉嚨，比紅豆冰更香滑，配搭確有新意。

朱古力湯圓$16
比綠茶小丸子大粒的有餡湯圓，外層糯米皮同是用綠茶粉自家製成，內餡則是極少人用的純朱古力，以香濃朱古力代替傳統芝麻、花生，湯丸一經煮過，熱朱古力溶化在皮內，只溶喺口，唔溶喺手！

試味報告： 湯圓皮薄，一咬開朱古力如泉湧般流出，外層青淡的綠茶皮令朱古力餡甜度減少，喜歡朱古力的人要試試。

店名：常滿坊
地址：將軍澳新都城第三期商場28號地下
電話：31946123
座位：45個
營業時間：上午11時半至午夜12時
付款方法：只收現金