全世界唔係掛住入飛買中銀（2388），就係等住今日長江生命科技（8222）上市，搞到噚日大市靜英英，小初幾乎悶到瞓着，惟有周圍打電話收料，當作解悶。
年輕賓架話，呢排特別多大陸客買證券行嘅殼，甚至冷門嘅金英控股（727），竟然都在佢哋考慮之列。
小初相信年輕賓架唔係吹水，好似早排嘅萬信（555）、萬勝（376）同埋太平洋興業（166）呢類從事證券同埋企業融資嘅公司，均先後出現控制權易手。
至於金英呢隻殼，年輕賓架話佢真係乾淨到不得了，早排大股東先至將證券業務買番，家陣公司只係淨得幾億元現金，同埋企業融資生意，加上大股東剛剛做完全面收購，街貨收得七七八八，係一隻靚到不得了嘅殼。
不過，靚嘢就一定唔會平，唔係一般人都買得起。
慕容小初