台灣《壹週刊》上個星期搬入內湖新寫字樓，昨天輪到台灣《蘋果日報》辦喜事。
話說「肥佬黎」計劃明年在台出版《蘋果》，除咗先在內湖新工業區買兩幢大樓做大本營，一幢畀「壹仔」用，一幢留畀《蘋果》用；重在桃園縣新屋鄉買咗間廠。呢間廠原本係一間美國大公司用開，本身建有一幢四層高寫字樓，另一邊係廠房。由於台灣《蘋果》要裝印刷機，於是拆咗個廠重建，並加固地基。昨日上晝吉時，舉行動土禮。
儀式由《蘋果日報》(香港及台灣)主席董橋主持，總裁堅哥當然亦有份。肥佬黎因為要去度假，所以冇現身。只見佢哋一齊上香、鞠躬、敬酒，然後戴番對手襪，揮動個鏟一鏟，禮成。
呢間新屋鄉新廠，距內湖寫字樓約四十五分鐘車程，地方雖然比將軍澳廠略細，但有新機，應該好有生產力。八方祝佢哋工程順利，早日投產。
﹙圖﹚昨日台灣《蘋果日報》舉行廠房重建動土儀式，主席董橋（右三）及行政總裁葉一堅（右四）帶領眾高層虔誠上香，祈求大吉大利。
傳真︰2623-9278
電郵︰