家陣啲新車,原裝跟車最低限度都會有部單碟機,可以畀你聽吓CD,有啲中價或以上嘅汽車甚至會有一套10碟CD機㖭,但一啲較為舊款嘅車種就未有呢啲先進設備,車主想話聽吓CD或者MD嘅唯一選擇,就係要換過一套汽車音響喇;但要買套有番咁上下嘅套裝機,最少都要千幾蚊,有啲較新嘅MD同MP3機頭,更加要接近3千蚊先有一套,對一啲駕車只為代步嘅車主嚟講,實在係一項龐大嘅支出。
假如想以低成本,而又能夠解決上述問題,其實都有一個比較簡單嘅辦法;大家只需要去音響器材或電器舖,購買一個如圖一所示嘅卡式帶型外置CD轉換器,然後插入原裝機頭卡式帶位(如圖二),而另一邊耳筒機插頭,就可以接駁到CD、MD或MP3手提播放機,咁你就只需付出約$80,就可以喺座駕上聽到CD啦!
文、攝:李志強