賓架陳到東南亞考察，喺新加坡五星級酒店碰到一位國際顧問公司嘅年輕顧問，交換名片之後，晚上再在大堂碰頭，於是一齊飲杯咖啡，詳談之下，先知道年輕顧問竟然係世姪，於是傾得比較深入。賓架陳話：「好彩佢係男仔，如果係女士，可能會俾人誤會我喺新加坡豪華酒店媾世姪女！」左丁山大笑：「你對鞋唔好擺喺門口就得啦！」
講完笑，賓架陳話：「某國貪污成風，以前到郵局寄掛號信，都要畀貼士，否則封信會好耐都寄唔出去。但呢啲都係小事啫，啲軍佬到新加坡消費，出手闊綽到極，你都明白係乜嘢事。世姪顧問被召到該國研究：如何降低該國重要入口物資嘅價格，以紓緩財赤。顧問公司啲鬼佬就唔出馬，派世姪去就實地研究，世姪兩下就查出原因，預備向部長提交報告，指出解決辦法，顧問費收得好容易。」
哈哈哈，邊有咁大隻蛤乸隨街跳！左丁山以前亦做過財務顧問，到該國做「路演」，知道該國輸入重要物資特別貴過人，皆因軍佬官僚層層過水濕腳，去到最後，入口價點唔會增加一至兩倍吖。賓架陳位世姪能夠入到國際顧問公司，肯定係叻仔，點會搵唔到答案。不過，搵到solution又點？賓架陳與左丁山英雄所見略同，就係叫世姪唔好再搞。賓架陳話：「我一聽見就噴咖啡，叫佢唔好有話直講，依書直說，你估處處都係香港咩，要記住啲軍佬官僚嘅利益勢力啫。」不過唔寫又點樣賺顧問費？原來顧問最值錢就係呢樣。