第一次到大陸創業的朋友，都會驚自己無經驗，創業分分鐘變失業兼蝕大本。若然信心不夠，或可嘗試到內地找些租金較平的露天攤位擺賣，好像阿Anne在廣州天河區攤位售賣玩具和兒童書籍，投資金額不足兩萬，還可累積實戰經驗，睇準機會再下一城。
記者：羅蘭 攝影：Manny
阿Anne擺賣的露天攤檔坐落於廣州天河區東站附近的中泰廣場，剛巧是百盛百貨大門口前，那兒鄰近商業和高尚住宅區，尤其在星期六、日人流特別多，所以都算是個理想的營商地點。
「我之前做過好多份工，例如機場保安啦、飲食業啦，但你知香港𠵱家經濟幾差，我根本搵唔到嘢做。後來有個朋友介紹，知道呢度有攤位出租畀香港人，衡量過所需嘅資金唔多，租金每日都係?500，平過深圳好多，風險亦低好多。於是咪同個拍檔一齊夾錢做生意囉。我重記得今年四月上嚟，籌備咗個多月，五月開始營業。」阿Anne豪爽地說。
「初時我聽到好多內地人叫香港人做『港燦』，我以為內地人好有錢啦，諗住賣啲比較HighClass嘅貨，所以一開始我就向朋友入咗好多由韓國同台灣帶返嚟嘅蠟燭同香精，以為可以Mark高啲價錢賣。點知原來呢度都有，雖然唔一樣，但都差唔多，價錢重比我平，於是我嘅貨完全賣唔去，惟有拎返香港，喺個朋友嘅舖頭寄賣。
「後來，我同呢度嘅速銷攤位代理公司商量，佢哋提醒我6月1日係國際兒童節，叫我嘗試將貨品種類改為兒童益智玩具或書籍，但喺內地賣嘅書本，全部都要係國產，唔可以有入口貨出現，所以要代理公司幫我搵貨源，但就俾我摸到條路喇。」阿Anne話6月1日當天的生意額共有八千幾蚊人民幣，是她幾個星期以來做生意做得最多的一天。
現時阿Anne的攤檔營業額，有五至六成是由售賣木製玩具得來，另外三至四成則由書籍得來，她亦開始計劃加入新貨種類，滿足顧客需要。
「我每星期只會喺周六、周日擺檔，雖然呢度周五都營業，但人流始終較少。而其他日子我就將啲貨拎上百貨公司嘅Counter寄賣。喺呢度擺檔嘅好處係租金唔貴，可以每兩個星期續約一次，人流又多，消費力高，要辦嘅營業牌照都有租場嘅代理公司幫我搞掂，唔使自己煩。」
由於露天檔攤與豪宅區為鄰，是以幫襯的顧客出手也比較闊綽。
「𠵱家嘅內地父母，特別係中上階層嘅，會較注重仔女嘅教育，所以肯花多啲錢買有教育性嘅書籍。此外，香港人亦會嚟幫襯，特別係木製玩具，佢哋話香港賣得好貴，我哋賣得較平，所以佢哋唔介意喺大陸買啲香港都有得賣嘅嘢。」
阿Anne的露天攤檔只做星期六、日，所以聘請員工方面，她只需請一個Part-time幫手便可，而聘請的事均由代理公司代勞。
「佢哋會幫我物色啲大學生，見到啱嘅就推薦畀我，人工唔算好貴，每日大約?50至?80，我只需對佢講清楚工作情況就得，而且佢亦好聽話，算幾好㗎。可能我呢度嘅貨比較簡單，所以容易Check數，如果唔見咗任何一件貨，員工都要自己負責。由開張到𠵱家，都無乜試過俾人偷嘢，只係試過有一套附送毛公仔嘅書，個毛公仔俾小朋友攞咗。」
做攤檔的另一好處，是可以喺代理公司授權經營的貨品範圍內，隨時轉換種類。以阿Anne為例，她只可以在攤檔中售賣書籍、文具及玩具這類乾貨。
「我諗過咗暑假，我可能會去代理公司嘅另一攤檔地點擺多一個檔口，或者去駿景花園嗰邊，因為嗰度係中上住宅區，又有學校同幼稚園，比較自成一隅。但我諗我都會繼續賣書，因為嚟大陸做生意，最好都係賣啲實際嘢比較好！」
由於速銷攤位代理公司會為租客代辦所有營業牌照，所以租客根本毋須辦理任何手續，只需跟代理公司簽一份租約，便可以自由擺檔，但貨品種類要在營業種類許可權的範圍內。
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。