章小蕙雖然欠下二億五千萬元巨債，但連日來仍瘋狂消費，前晚她在金鐘太古廣場逛街兩小時，便花了約二千元，買了一大堆化妝品、CD及書籍等。而昨日章小蕙往銅鑼灣看醫生後，透露自己患骨刺，周身病痛。
章小蕙雖然欠下裕泰興財務二億五千萬元債務，但她連日來仍購物慾高漲，似乎完全沒有將欠債當作一回事。大前晚章小蕙買完生果後，再往跑馬地滿足樂做了近四小時按摩，保守估計埋單要過千元。前晚章小蕙更加瘋狂，逛街逛足兩個多小時，共花了約二千元購物。
前晚七時許，章小蕙乘的士由中環時裝店到金鐘太古廣場，她先往Tony&Tina看化妝品，用了一百六十元買眼影，然後她再到JumboGrade書店買了一本書，還在HongKongRecord唱片舖買了數張CD。
其後章小蕙轉到連卡佛繼續買她至愛的化妝品，先去LauraMercier買眉筆和唇膏，用了三百七十八元，然後在AnnaSui買化裝袋和眼影，用了五百多元，最後在Prada買了一盒潤唇膏，價值五百八十元，以上所有消費，章小蕙都是用信用卡簽帳。
記者問章小蕙購物後還有甚麼行程，她笑說：「去睇戲好唔好？我唔想返屋企住。」接着章小蕙便往麥當勞用八元買了一包薯條，一邊逛街一邊吃，口中更輕輕哼着歌，心情十分愉快。未知章小蕙是否行街行得太開心，她所穿的黑色半截裙後面的扣鬆開，露出一截大髀肉，但章小蕙卻完全沒有察覺。最後她乘坐的士返回跑馬地林肯大廈寓所時，已接近晚上十時。
而昨日下午一時許，章小蕙則到了銅鑼灣看醫生，她透露自己患有骨剌。返回時裝店後，章小蕙又特別換了衫讓記者拍照，並在店舖內播着歌曲《You'restillyou》，並將自己的書簽名後送給記者。
章小蕙說：「我成個人都要大執，眼嘅微絲血管爆咗，要十日先好得番，骨刺就要十年八年，𠵱家我嘅頸椎骨同雞翼位（手臂）都好痛，不過每日我都瞓到六、七個鐘，食得瞓得，我冇豪過冇貧過，都係一樣生活，煮到埋嚟咪食咯！」
章小蕙續說：「舖頭嘅生意就託賴啦，我有同鄧達智傾合作嘅嘢，想將生意轉移去大陸，我想搵多幾個生意夥伴，我會留守香港，主力買貨同做設計，我唔想做得咁辛苦，我嘅仔女都已經到咗唔係好需要媽咪照顧嘅年紀，香港係純粹吃喝玩樂嘅地方，亦畀到我好多寫作靈感。」
問章小蕙自陳曜旻遠走法國後，目前可有新追求者？她說：「我日日有二十幾個保鑣（指記者）、七架車跟我出街，邊有人敢追我？噚晚就有七個大漢陪我買麥當勞。」
再問章小蕙可有與陳曜旻通電話時，她先是沉默不語，其後她又表示要講清楚，陳曜旻在裕泰興為她做擔保涉及的六百萬元款項，法庭已判陳曜旻不用負責，所以陳曜旻破產與她無關。記者追問陳曜旻做擔保的樓宇，她是否持有人時，章小蕙說：「總之層樓𠵱家係裕泰興持有。」
此外，相士蘇民峰日前指她十年冇運行，章小蕙說：「人與人之間要講緣份，有咁多高人照住我都係緣份，始終面對面傾過偈、交過心嘅比較真實，光憑張相就測我好唔好，張相影得好咪鴻運當頭，影得衰咪衰十年咯。陳伯都有指點過我，但佢唔會左右我着乜嘢衫，呢個係我嘅專長，所以佢任我着乜。」
採訪：梁錦雯、楊潔雯
攝影：娛樂突發組