中原同美聯老早鬥到出晒面，家吓連響內地都開始埋牙。蘭西噚日去深圳福田皇崗睇樓，見到皇御苑商場入口就係中記同美記分行，一左一右，好似一對門神咁，同香港嘅情況十足十。
兩個舖位都有六百幾方呎。聽講舊年皇御苑一期入伙後，中記就率先租用商場開分行。兩三個月後，美記跟住進場，重開正喺隔籬。舖位設計同香港分行分別唔大，好似美記曾賣行廣告嘅「你所委託我必承諾」口號，就大大張貼在分行內。中記就係「公平競爭公平交易」。除咗呢兩家代理之外，個場重有間地膽分行，叫中國房產。
一個場有三家代理行，證明當地市場應有可為。好似淨係做皇御苑一期，就有1590伙，同香港一個屋苑一樣大，而皇御苑重有二至五期。不過二期就畀咗中記做獨家。內地一二手市場開始興旺，香港代理行都會打主意，遲吓內地商場可能會變成代理行天下都唔定。
蘭西同啲代理傾開，得悉當地住宅租務唔錯，通常放盤一兩個禮拜就可以租出。兩房單位月租二千六至三千蚊，三房就可以超過三千五。
長實旗下物業管理公司高衞物業出現人事變動，最高負責人麥耀祖經已離職。江湖傳聞，今次嘅變動，好似話同長實有意將高衞同港基兩間管理公司合併有關。由於有啲大發展商底下，都有超過一家管理公司，一旦長實之合併，證明能提高效益嘅話，咁其他管理公司高層，會唔會有「大地震」？另外，聽講麥生已去幫華置劉生，新舊老細都係潮州人。
上海昔日十里洋場，隨着中國入世，銳意要成為中國嘅國際大都會同國際金融中心，愈嚟愈多外國企業同外國人在此設總部同居住，加上房產政策不斷改革，地產市場日益蓬勃。
上海各區政府開始向外推廣房地產，其中以徐滙區政府最積極。繼去年底來港進行一連四日的大型展銷會，有25家上海地產公司共30個樓盤展銷後，聽講今年10月又去新加坡搞個規模相若樓盤展銷會。根據統計，上海樓買家，暫時只有5%係外國人，發展空間大。除咗徐滙區外，浦東區及靜安區政府，亦分別在下月及明年1月來港搞展銷會。
此外，來自上海消息，和黃地產爭奪靜安區南滙路地皮，聽講由於靜安區未來極少土地供應，區政府極其關注賣出土地後，樓房興建設計，因此今次競投者要先擬定好建築及配套設計，得到區政府認可，才可再參加競投，再非價高者得。
乜嘢類型嘅單位最受歡迎？拆細單位是也！美聯九龍寫字樓助理營業經理鄺寶謙同蘭西講，尖沙嘴甲級寫字樓新港中心1座10樓09至10室，2893方呎，3個月前委託佢哋獨家放售，但反應麻麻。大約喺兩個禮拜前，建議業主將單位一分為二，結果火速被兩名用家承接。
其中10室，1450方呎，以359.6萬元，每方呎2480元賣咗，創下該廈97年以來新低紀錄，新買家係玩具業廠家。鄺寶謙話，買家由睇樓、議價，以至扑鎚，只不過用咗3粒鐘，近年罕見！至於09室，1443方呎，亦都喺早幾日以每方呎2500元沽出，新買家從事貿易生意。
事實上，以現時市況，介乎一千到千五方呎嘅單位，最受用家歡迎。上述單位業主85年一手購入後打通自用，諗唔到17年後，要間番細先至有人要！正所謂合久必分。
地產代理為咗做成生意，一定要遷就客人，乜嘢時間同地點都冇計較。利記陸偉傑透露，藍田滙景花園有個賣家，喺深圳二線工作，一個月只回港一次，為咗方便佢，就約喺羅湖一間餐廳簽約，自己不辭勞苦，親身送定金上去，終於做成單生意。
個單位係10座低層F室，912方呎，以228萬元賣出，每方呎2500元，比同類單位造價低咗超過一成。業主90年以約130萬一手買入自住，𠵱家賺90幾萬。賣咗層樓之後，重未決定再入市抑或租樓住。
送定番內地例子近嚟增多，同港人內地置業潮有冇關呢？假如啲業主真係賣咗樓番內地長住同做嘢，對本港樓市都唔好話冇影響。
陸偉傑話，滙景今個月交投幾好，到𠵱家已經有12宗，差1宗就等於上個月總數，原因可能係將軍澳支線就快通車，業主肯減價。佢認為，滙景個價要落到2500蚊一呎，先有多啲承接，否則啲買家就會去咗將軍澳。
蘭西
電郵地址：