港股成交進一步萎縮，唔使講大家都知道因為市場焦點落喺中銀香港（2388）身上，認購中銀贏面極高，以致冇咩人有興趣炒二三線股。事實上散戶認購可享有5%折扣，等如一認購就先贏5%，再加上中銀派息比率定為60至70%，畀着阿虎都會將存款提晒出嚟認購中銀香港，淨係賺5%折扣都已經好過存1年定期。
不過，若因中國概念而買中銀香港嘅話，就不如撈番恒生（011）好過。中銀香港母公司係中國銀行，所以唔少人以為中銀香港有中國概念，除非大家以為中國會將中國銀行注入中銀香港，否則中銀香港又點可以返內地同阿媽爭飯食呢？買中銀香港只睇香港經濟復甦速度，若認為香港前途有限，就無謂長線持有中銀香港。
噚日港股相當淡靜，成交僅45億元。黑客話聽到有莊家大聲叫苦，因為之前唔少二三線股炒咗上去，至今都引唔到散戶跟進接棒，仍然玩緊左手交右手，加上證監會經常走去證券行查數，所以近排要小心，提防有二三線股出現斬倉。
第一龍浩（875）噚日勁升14.3%，收0.248元。阿虎問黑客，呢隻股會唔會有問題？佢話暫時都唔會，因為此股重有條大水喉射住，加上重未完成配股抽水，以及落實投資國內種植優質幼苗項目，所以應該重未炒完，但0.25元阻力唔易突破。
長江生命科技（8222）今日上市，市傳暗盤價只係2.30元左右，今日唔知會否抽高就有大戶沽貨呢？
阿 虎