薛家燕（好姨）早前被一個以學生為被訪對象嘅「好爸媽形象」調查，選佢做「好媽媽」，所以最近有出版商邀請好姨，以佢個樣做嘜頭出版漫畫書《母愛最強》。馮仁昭知道本漫畫將於日內推出，而好姨重會喺嚟緊嘅星期六（二十日），去灣仔會展舉行嘅書展度出席簽名會。
好姨希望本漫畫可以帶出父母要同子女保持親子關係嘅訊息，漫畫嘅內容講好姨同子女平時點樣溝通。講開本漫畫，好姨噚日喺無綫電視城度話：「漫畫師本來畫得我瘦啲，我叫佢哋加番個雙下巴同埋身形要肥番啲，咁樣會神似啲。」漫畫故事重有好姨三個仔女石祐珊、石耀珠同石耀庭嘅Q版造型。
另外，好姨見近年學生嘅書簿費昂貴，所以佢特別喺漫畫書中搞個填色比賽，重自掏腰包攞四千五蚊出嚟，獎勵三位得獎者，等佢哋可以用呢筆錢買新書開學，馮仁昭覺得都好有意義噃。
有四十幾年煮餸經驗嘅黃淑儀最近出咗本書，為咗本書佢重專登喺加拿大返嚟，出席噚日喺尖沙嘴舉行嘅記者會。
黃淑儀啲好朋友好似莫文蔚媽咪莫何敏儀同羅蘭噚日都有捧場。黃淑儀即場炒咗味蒜茸牛油炒蝦畀大家食，莫何敏儀重讚不絕口。
梁詠琪（GiGi）噚日去跑馬地出席「聯合國兒童基金會萬里同心西藏行」記者會。GiGi話：「我下個月會去拉薩探訪，不過佢地話唔使打預防針，但係我怕會有高山症。重有第一日去到唔准沖涼。」GiGi今次會探訪孕婦同小童，當地所有孕婦都要喺屋企產子，GiGi會同埋專業人員教佢哋唔好咁做。
容祖兒（Joey）日前去北京出席~H2O+喺新世界百貨嘅開幕禮，吸引咗幾百名市民圍觀。呢個宣傳活動原本安排喺下午四點舉行，但係歌迷之前兩個鐘已經去咗霸位，搞到現場水洩不通。Joey出現嗰陣，在場觀眾即歡呼不絕，要Joey向佢哋示意，觀眾嘅激動情緒先至稍為平息。現場司儀又同觀眾大玩遊戲，派Joey嘅唱片，有歌迷重因為攞唔到獎品而喊。
何韻詩（阿詩）噚日去港台擔任「粵港澳小學常識問答比賽」嘅嘉賓，最近組合EO2其中一個成員Otto俾人踢爆暗戀阿詩，記者同阿詩講開，佢好興奮咁話：「哈！哈！係咩？成日都有㗎啦！我哋識咗五年，點會呀？佢成日都亂噏。」
應采兒噚日喺灣仔宣傳網路遊戲，佢話拍完新片《我左眼見到鬼》後，肥咗幾磅，加上啱啱出智慧齒，塊面好腫。而下月中佢會去北京，同古天樂拍部愛情片，所以佢想趁呢段時間返美國剝智慧齒，希望咁塊面會瘦番一啲。
亞視劇集《我和殭屍有個約會》嘅監製冼志偉月初因癌病逝世後，有唔少觀眾要求亞視重播該劇。亞視亦徇眾要求，喺聽晚開始逢星期一至五，晚上十二點四十分喺本港台重播，聽晚重會連播兩集，套劇首播時觀眾反應幾好㗎。
環球唱片新人麥浚龍入行日子雖短，不過佢已經有機會到杭州出席中國原創音樂流行榜活動，重以嘉賓身份表演㖭。麥浚龍話自己係新人，有機會演出已經好開心，而且重可以喺杭州遊覽吓，去岳王廟參觀㖭。