外圍股市氣氛唔好，恒指噚日牛皮偏軟，最後跌66點，收10581。美國會計醜聞牽連愈來愈大，相信現時美股班CEO關心盤數有冇問題多過公司有冇錢賺。此外，美股第2季嘅盈利表現，估計唔易有驚喜。美股形勢唔好，始終令投資者存有隱憂。
中銀香港（2388）噚日正式開始招股，散戶反應唔算好熱烈，其中一個主要原因係市場氣氛唔好，投資者對後市有戒心。恒指噚日成交只有45.4億元，好多人話啲資金被長江生命科技（8222）及中銀招股縛住，其實好多人睇唔通後市，唔敢輕率入市至係真正原因。
長科今日掛牌，相信表現唔會太差，但趙飛雲冇乜興趣玩生化股，反而會留意吓長實（001）走勢會唔會有進一步突破。長實噚日逆市升0.50元，收66.50元，企於10日線66.20元及20日線66.30元之上收市，9RSI升破14RSI亦係利好訊號，不過成交薄弱係美中不足。
以勢論勢，長實短期如企穩66.50元之上，會上試68元阻力，破位可挑戰50日線（現處70.70元）。因此不妨記存長實Call輪9252，如見長實走勢出現突破，可買番些少短炒。
趙飛雲